Yr awyren ar Faes Awyr Mona ar ôl y ddamwain
|
Mae awyren jet wedi cwympo i'r ddaear ym Maes Awyr Mona yn Sir Fôn.
Dywedodd yr heddlu fod y peilot wedi dianc cyn i'r awyren Hawk daro'r ddaear tua 12.25pm ddydd Gwener.
Aed â'r peilot i Ysbyty Gwynedd ym Mangor lle dywedodd llefarydd nad oedd ei anafiadau'n ddifrifol ac mae e bellach wedi cael gadael yr ysbyty.
Dywedodd y Llu Awyr na allai ddweud eto beth oedd achos y ddamwain.
Anfonodd Gwasanaeth Tân y Gogledd bedair injan dân, dau gerbyd argyfwng ac uned reoli.
Cafodd tîm achub a hofrennydd y Llu Awyr eu hanfon i'r safle.
'Ymchwiliad'
Mae Maes Awyr Mona ryw bum milltir o Faes Awyr y Fali, canolfan y llu awyr ar gyfer hyfforddi peilotiaid awyrennau Hawk.
Dywedodd Mark Byrne ar ran y Llu Awyr yn Y Fali: "Mi alla i gadarnhau mai un person oedd ar fwrdd y jet. Byddwn ni ddim yn ceisio dyfalu beth oedd achos y ddamwain gan fod ymchwiliad wedi dechrau ... "
A dywedodd Dennis Morris, 68 oed sy'n byw ym Modffordd, ei fod yn meddwl ei fod wedi clywed "sŵn damwain car difrifol."
Dywedodd y Llu Awyr na allai ddweud eto beth oedd achos y ddamwain
|
"Roedd yna sŵn metal yn gwichian. Pan edrychais i allan mi welais i awyren wedi ei thorri yn ddwy.
"Mi es i allan a gweld fod y peilot wedi glanio mewn coed a'i sedd yn y cae nesa."
Ym Medi 2001 fe blymiodd awyren Hawk i'r ddaear i gae gyferbyn â Maes Awyr Mona. Llwyddodd y peilot o Ganolfan Llu Awyr Fali i ddianc.
Ar y pryd dywedodd trigolion Bodffordd eu bod yn poeni am nifer y peilotiaid oedd yn cael eu hyfforddi yn y Fali.
Home
