Papur dyddiol gam yn nes

Y Byd: Hwb ariannol

Mae cyhoeddi'r papur dyddiol Cymraeg cynta gam yn nes am fod cais am gymorthdal rhanbarthol yn llwyddiannus.

Bydd hyn yn golygu bod modd cyflogi mwy o staff a phenderfynu amserlen ar gyfer cyhoeddi'r rhifyn cynta, meddai'r cyhoeddwyr.

"'Dan ni'n falch iawn fod rhan ola'r jig-so yn ei lle," meddai Ned Thomas, cadeirydd y cyhoeddwyr, Cwmni Dyddiol.

"Mae hyn yn caniatáu i ni osod yr amserlen yn lle aros am olau gwyrdd o ran grant."

Er hynny, dywedodd nad oedd dyddiad pendant ar gyfer cyhoeddi'r rhifyn cynta.

Roedd yn annhebyg, meddai, y byddai'r rhifyn cynta cyn yr haf. "Mae'n gwthio'r amserlen y tu hwnt i'r haf."

Doedd e ddim yn fodlon dweud faint oedd y cymhorthdal rhanbarthol.

Penodi

Ond awgrymodd y gallai'r pencadlys fod yn y canolbarth.

"Mae adeilad addas iawn ar Barc Ecolegol Machynlleth.

"Bydd rhaid i ni ystyried manylion ariannol Cyngor Powys."

Yn Nhachwedd cyhoeddwyd fod dau wedi eu penodi'n olygydd a dirprwy olygydd papur newydd Y Byd. Y ddau oedd Aled Price a Catrin Rogers.

Mae Mr Price, o Gaerdydd yn wreiddiol, yn newyddiadurwr profiadol sydd wedi gweithio am flynyddoedd i BBC Cymru.

Bu'n cynhyrchu rhaglen Newyddion ar S4C ac yn gweithio yn uned wleidyddol BBC Cymru.

Cyn ymuno â BBC Cymru bu'n gweithio ar raglen Y Byd ar Bedwar i HTV Cymru.

'Project hanesyddol'

Dywedodd ei fod yn edrych ymlaen yn fawr at afael yn yr awenau a bod yn rhan o broject "mor hanesyddol â hwn, y papur dyddiol Cymraeg cynta erioed".

Y dirprwy olygydd fydd Catrin Rogers, golygydd papur lleol yn Hounslow yn Llundain.

Fel newyddiadurwraig ar ei liwt ei hun mae hi wedi cyfrannu at bapur yr Observer a nifer o gylchgronau.