BBC Home
Explore the BBC
Chwiliwch yn Gymraeg
---------------
---------------
---------------
BBC Vocab
OFF / I FFWRDD
» Turn ON
Troi YMLAEN
» What is VOCAB? Beth yw GEIRFA?
SAFLEOEDD
ERAILL BBC
---------------
NEWYDDION
MEWN IEITHOEDD ERAILL
Arabic
Espanol
Russian
Chinese
Diweddarwyd: Dydd Mercher, 4 Gorffennaf 2007, 13:09 GMT 14:09 UK
Clymblaid o dan y lach
Lynne Neagle AC
Lynne Neagle: Y glymblaid 'yn gamgymeriad'
Mae pum aelod blaenllaw o'r Blaid Lafur yn gyhoeddus wedi beirniadu'r glymblaid Phlaid Cymru.

Y pump yw'r ACau Lynne Neagle, Ann Jones, Karen Sinclair ac Irene James a'r AS Kim Howells.

Mewn erthygl yn y Western Mail fe ddywedodd AC Torfaen Ms Neagle fod y rhai yn erbyn y glymblaid wedi cael eu hanwybyddu a'u sarhau.

Cyhuddodd Gweinidog y Swyddfa Dramor Dr Howells Rhodri Morgan o "helpu i roi ein cymunedau yn nwylo cenedlaetholwyr analluog ac arwahanwyr."

Fe fydd Llafur a Phlaid Cymru'n trafod dogfen "Cymru'n Un" mewn cynhadleddau arbennig dros y penwythnos.

Ni enillodd Llafur fwyafrif yn Etholiad y Cynulliad ar Fai 3.

Ond yr wythnos ddiwethaf fe gafodd clymblaid hanesyddol rhwng Plaid Cymru a Llafur ei chytuno mewn egwyddor.

Rhodri Morgan a Ieuan Wyn Jones
Rhodri Morgan a Ieuan Wyn Jones wrth ghoeddi'r cytundeb

Fe fydd rhaid i'r cytundeb gael ei gymeradwyo yng nghynhadledd arbennig y Blaid Lafur ar Orffennaf 6 a chynhadledd Plaid Cymru ar Orffennaf 7.

Yn y Western Mail ddydd Mercher fe ddywedodd Ms Neagle ei bod hi'n poeni am y glymblaid.

'Niweidiol'

Roedd aelodau'r blaid, cynghorwyr ac Aelodau Seneddol, meddai, yn haeddu cael mynegi barn am benderfyniad mor bwysig.

Dywedodd fod y ddogfen yn "newid cyfeiriad sylfaenol ac yn niweidiol i wleidyddiaeth Cymru."

"Dwi'n credu ... y dylai llywodraeth leiafrifol Lafur sy yn gyfrifol, yn atebol ac yn fodlon gwrando ar y pleidiau eraill gael y cyfle i lwyddo," meddai

Fe ddywedodd Karen Sinclair, Ann Jones ac Irene James nad oedden nhw'n credu y gallai'r cytundeb roi sefydlogrwydd i bobl Cymru.

"Mae diffyg athroniaeth gyffredin rhwng y ddwy blaid a'r dyheadau gwahanol am ddyfodol Cymru yn golygu y bydd yn anodd i'r glymblaid barhau am bedair blynedd ...

'Troi cefn'

"Rydyn ni'n credu fod ... y ddogfen yn troi cefn ar yr hyn bleidleisiodd pobl drosto yn y refferendwm datganoli yn 1997."

Mewn llythyr i swyddogion Llafur ei etholaeth ym Mhontypridd fe anogodd Dr Howells iddyn nhw wrthod y glymblaid.

"Os yw'r cytundeb yn cael ei gymeradwyo ... fe fydd yn golygu y bydd Llafur yn y cynulliad yn gyfrwng i droi rhai elfennau o ddyheadau gwleidyddol Plaid Cymru yn ffaith." meddai Dr Howells.

"Mae'r dyheadau, wrth gwrs, yn ganolog i agenda'r cenedlaetholwyr.

"Yn y pen draw, maen nhw'n arwain at annibyniaeth."




HEFYD
Morgan am sicrhau cefnogaeth
01 Gorff 07 |  Newyddion
'Pryderon difrifol' ASau Llafur
29 Meh 07 |  Newyddion
Clymblaid gam yn nes
27 Meh 07 |  Newyddion
Clymblaid: Pwysau ar Morgan
20 Meh 07 |  Newyddion
Plaid i barhau i drafod Llafur
16 Meh 07 |  Newyddion
Dwy blaid: 'Bargen hanesyddol'
13 Meh 07 |  Newyddion

CYSYLLTIADAU RHYNGRWYD:
Dyw'r BBC ddim yn gyfrifol am gynnwys safleoedd rhyngrwyd allanol


Gwasanaethau ebost | ticer newyddion | Amodau Defnyddio | Preifatrwydd a Chwcis


Yn ôl i'r brig ^^