Tai fforddiadwy i bobl leol

Mae prisiau tai Gogledd Iwerddon yn codi

Mae 'na gynllun yng Ngogledd Iwerddon i gynnig tai fforddiadwy wrth i brsiau tai godi.

Ar gyfartaledd mae'r pris wedi codi £600 yr wythnos.

Mae'r cynllun yn Ballygalget yn Sir Down a nod y datblygwr yw codi 20 o dai ar gae yr oedd yr Eglwys Babyddol yn berchen arno.

Dywedodd y Tad Dermot McKay fod defnyddio'r cae wedi ei drafod am y tro cynta yn 1999.

"Y syniad oedd y gallai'r eglwys wneud rhywbeth o ran cadw'r gymuned yn fyw, yn enwedig o gofio bod tai'n brin yn yr ardal."

'Troi'r llanw'

Cafwyd caniatâd cynllunio yr wythnos ddiwetha a bydd adeiladwyr yn cychwyn eu gwaith cyn y Nadolig.

Dywedodd y Tad McKay fod rheolau cynlluniau'n fwy llym nag o'r blaen.

"Yn aml iawn, mae safleoedd yn costio mwy na £100,000 a pha obaith sydd gan gwpl o gael yr arian i brynu cartre?"

Mae mynegai prisiau tai Prifysgol Ulster yn dangos bod pris tŷ ar gyfartaledd yng Ngogledd Iwerddon yn £162,821, sef £31,000 yn fwy na 2005.