Ceidwadwyr: 'Mwy o rym lleol'

Ceidwadwyr Cymru yn benderfynol o herio Llafur

Dylid mynd â datganoli gam ymhellach, medd arweinydd y Ceidwadwyr yn y cynulliad, Nick Bourne.

Fe fu Mr Bourne, AC Gorllewin a Chanolbarth Cymru, yn annerch cynadleddwyr ei blaid yn Bournemouth ddydd Llun.

Pwysleisiodd bwysigrwydd y gymuned leol gan ddadlau bod yn rhaid i benderfyniadau gael eu gwneud ar lefel leol.

Y neges hon, meddai, fyddai'n amlwg yn ymgyrch ei blaid yn etholiadau'r cynulliad ym Mai 2007.

"Rhaid rhoi grym i bobl ym mhob stryd, ym mhob cymuned ac ym mhob tref a phentref.

Prawf 'go iawn'

"Byddwn yn ymestyn ffiniau datganoli i'r eitha, yn rhoi llais i bobl Cymru er mwyn iddyn nhw gael penderfynu'r dyfodol," meddai.

Dywedodd y byddai'r Ceidwadwyr yn adolygu Deddf yr Iaith er mwyn creu Cymru fyddai'n "wir" ddwyieithog.

Yn ei araith ddydd Lun bu'n sôn am yr amgylchedd a'r angen am "ddewis" ym meysydd addysg ac iechyd.

Dywedodd Cheryl Gillan AS, llefarydd y blaid ar Gymru, y byddai etholiadau'r cynulliad yn "brawf go iawn" i'r Ceidwadwyr.

Bydd hi'n annerch y cynadleddwyr ddydd Mawrth.

Rhybuddiodd y byddai'r Blaid Lafur yn chwarae'n fudur ond bod rhaid i'r Ceidwadwyr gael mwy o seddi ar Fai 3.