Swyddi: Y Byd yn ei le?

Mae'r swyddi wedi eu hysbysebu ar safle gwe Y Byd

Mae papur dyddiol gam yn nes wrth i swyddi Y Byd gael eu hysbysebu.

Ar wefan y cwmni mae chwech o swyddi - newyddiadurol a rheoli - yn cael eu hysbysebu.

Y gred yw y bydd y rhifyn cyntaf yng ngwanwyn 2007 a gallai'r papur gael ei lansio Ddydd Gŵyl Dewi 2007.

Mae cadeirydd y cwmni gafodd ei sefydlu i greu'r papur, Ned Thomas, wedi dweud nad oedd dyddiad pendant eto ar gyfer y lansiad.

"Mae'r holl ymdrech yn dibynnu ar hyder a ffydd fod pethau'n bosib, a bod pobl dalentog am ymgymryd â'r gwaith," meddai.

Dywedodd fod y cwmni wedi gofyn i unrhyw un oedd â diddordeb i gysylltu â nhw ers dwy flynedd.

Mae angen ffydd a gobaith i weld rhywbeth fel hyn yn cael ei wireddu Gwenno Dafydd

Y swyddi ar y wefan yw golygydd, golygydd newyddion, golygydd erthyglau nodwedd, swyddi rheolwr cyffredinol, rheolwr hysbysebion a rheolwr cylchrediad.

Dywedodd Mr Thomas fod digon o ddiddordeb yn y swyddi newyddiadurol ond bod angen pob math o sgiliau i weithio ar bapur newydd.

Roedd angen denu sylw "pobl y tu allan i gylchoedd llenyddol," meddai. Bydd y swyddi yn y canolbarth.

Mae actorion, cerddorion, arweinwyr crefyddol, awduron ymhlith y rhai sydd eisoes wedi cefnogi Y Byd.

Hyd yn hyn mae Ioan Gruffudd, Gruff Rhys, Maureen Rhys, John Ogwen, Jan Morris, Huw Edwards, Angharad Mair, Ray Gravell, Mary Lloyd Jones wedi ymaelodi â chlwb y papur.

£300,000

Mae cyfranddalwyr wedi buddsoddi dros £300,000.

Un o'r rhai sydd wedi cyfrannu yw'r actores a'r sgriptwraig Gwenno Dafydd sy'n falch fod pethau'n symud yn eu blaen.

"Dwi wrth fy modd a dweud y gwir ... ro'n ni'n dechrau poeni falle na fyddai pethe ddim yn digwydd.

"Ro'n i wedi buddsoddi yn y gobaith fod pethe'n datblygu a phan mae amser yn mynd heibio, chi'n dechrau pendroni a meddwl: 'A ydyn ni wedi gwneud y penderfyniad cywir?'

"Mae angen ffydd a gobaith i weld rhywbeth fel hyn yn cael ei wireddu."