Y bwriad yw canolbwyntio mwy ar wasanaethau yn ysbytai rhanbarthol y gogledd
|
Cafodd y cyfarfod cyhoeddus cyntaf ei gynnal gan Fwrdd Iechyd Lleol Dinbych yn Llanelwy nos Iau.
Mae nifer yn erbyn canoli gwasanaethau yn y tri phrif ysbyty oherwydd pryderon am effaith ar wasanaethau lleol.
O ganlyniad i hyn mae Cyngor Conwy yn ystyried cynnal refferendwm am y cynlluniau i dorri gwasanaethau yn Ysbyty Llandudno.
Ond siomedig fu'r ymateb yn y cyfarfod cyhoeddus nos Iau - dim ond wyth o aelodau'r cyhoedd oedd yn bresennol.
Yn Chwefror cyhoeddwyd bwriad yr ymddiriedolaeth i gau dau ysbyty - Ysbyty Abergele ac Ysbyty HM Stanley yn Llanelwy a chanoli sgiliau arbenigol yn nhri ysbyty rhanbarthol y gogledd - Ysbyty Gwynedd ym Mangor, Ysbyty Glan Clwyd ym Modelwyddan ac Ysbyty Wrecsam Maelor.
Cafodd y ddogfen ymgynghorol "Cynllun Gogledd Cymru" ei ch yhoeddi i amlinellu newidiadau arfaethedig rhwng y pump a 10 mlynedd nesa.
'Newid defnydd'
"Mae'r cynllun ar hyn o bryd yn sôn am gadw tri ysbyty yn y gogledd a chynyddu'r gwasanaethau yno a newid defnydd yr ysbytai llai," meddai Sally Baxter, cyfarwyddwraig datblygu a rheoli perfformiad bwrdd iechyd lleol sir Ddinbych.
"Byddwn yn edrych ar y ffordd orau ymlaen ar gyfer yr ysbytai llai.
"Rydym yn ystyried cau ysbytai nid gwasanaethau, symud y gwasanaethau i lefydd mwy addas."
Rhaid i sylwadau gyrraedd yr ymddiriedolaeth cyn Mehefin 26.
Dydd Gwener cafodd Ymddiriedolaeth Iechyd Gogledd Orllewin Cymru, sy'n gyfrifol am Ysbyty Gwynedd ym Mangor ac Ysbyty Llandudno, ei henwi fel un o 40 prif ysbytai ym Mhrydain.
Daw'r wobr lai na mis ers i'r ymddiriedolaeth gyhoeddi eu bod wedi cyrraedd pob un o dargedau Llywodraeth y Cynulliad yn ystod y 12 mis diwethaf.
"Mae hon yn gamp arbennig gan y staff ac rydym yn falch iawn o gael ein henwi fel un o'r 40 prif ysbytai ym Mhrydain am y chweched blynedd yn olynol," meddai Martin Jones, prif weithredwr yr ymddiriedolaeth.
Home
