Sgowt Man U yn marw

Roedd Huw Roberts yn teithio llawer i chwilio am dalent i Man U

Bu farw un o sgowtiaid enwoca Clwb Pêl-Droed Manchester United, Huw Roberts, nos Fawrth.

Roedd yn 84 oed ac yn byw yn Y Groeslon ger Caernarfon.

Mr Roberts oedd yn gyfrifol am ddarganfod rhai o dalentau mawr y gogledd a sicrhau enwogrwydd iddyn nhw yn Old Trafford.

Ymhlith y rhai y gwnaeth eu darganfod y mae Mark Hughes, yr hogyn o Riwabon aeth yn un o gewri Manceinion, Barcelona a Chymru.

Roedd Mr Roberts yn wyneb cyfarwydd iawn ar gaeau pêl-droed ar hyd y gogledd ac yn chwilio am dalent i'r clwb yr oedd yn ei garu.

Roedd yn amlwg bod y dyn mawr yma [Syr Alex Ferguson] yn meddwl y byd o Huw Roberts a'i fod yn cydnabod bod gan y clwb ddyled fawr iawn iddo Nic Parri, sylwebydd pêl-droed

Heb os ei ddarganfyddiad enwoca oedd cyn ymosodwr y clwb a rheolwr Cymru, Mark Hughes.

Bu Mr Roberts yn sgowt am ddegawdau i'r clwb ac roedd yn dal i weithio i'r tîm yn achlysurol.

Un oedd wedi ei gyfarfod ar sawl achlysur oedd y sylwebydd pêl-droed, Nic Parri.

"Yr hyn sy'n arbennig am y newyddion ac sy'n crynhoi Huw ydi bod hyn yn mynd i fod yn newyddion trist mewn cymaint o wahanol agweddau o fywyd, yn ei filltir sgwâr ac ymysg ei deulu."

'Dyn pêl-droed'

Dywedodd bod ei enw yn ymestyn yn bell iawn.

"Dwi'n gwybod heddiw y bydd Mark Hughes, Ryan Giggs a Syr Alex Ferguson i gyd yn teimlo'r tristwch.

"Dyma rai o'r cannoedd ar gannoedd sydd wedi bod yn agos iawn ato.

Cafodd Mark Hughes ei ddarganfod gan Mr Roberts

"Dyn ei bobl a dyn pêl-droed oedd o hefyd."

Eglurodd y byddai rhywun yn gwybod y byddai'n cael sgwrs am bêl-droed gyda fo a bod ganddo farn a oedd "weithiau yn gignoeth a dadleuol, ond yn farn oedd wedi ei selio ar fyw ymhlith y rhai oedd yn wybodus neilltuol yn y maes".

Dywedodd mai'r profiad mwya difyr yn ei gwmni oedd cael mynd i Old Traffod ar wahoddiad y clwb i wneud erthygl amdano.

"Fe ges i ddwy awr a hanner yn ei gwmni o a Syr Alex, yn ystafell y rheolwr," meddai.

"Yng nghanol ei brysurdeb roedd Alex yn gwbl gwbl hapus i son am bêl-droed a Huw.

"Roedd yn amlwg bod y dyn mawr yma yn meddwl y byd o Huw Roberts a'i fod yn cydnabod bod gan y clwb ddyled fawr iawn iddo."

Mae Mr Roberts yn gadael gweddw a phedwar o blant.