Imogen yn gadael ty'r Brawd Mawr

Dywedodd Imogen ei bod yn edrych ymlaen at weld ei theulu

Mae'r Gymraes Imogen Thomas wedi gadael cystadleuaeth Big Brother nos Wener wythnos cyn y rownd derfynol.

Hi a Richard Newman 33 oed o Ganada fu'n wynebu pleidlais y cyhoedd.

Llwyddodd Imogen, 23 oed o Lanelli i aros yn y tŷ am 86 o ddiwrnodau a hi oedd ffefryn y bwcis i fynd.

Mae hi am i'r Cymro Glyn Wise ennill y gystadleuaeth a'r wobr o £100,000.

Ymatebodd Imogen gan wenu a neidio'n hapus pan gyhoeddwyd mai hi oedd am gael ei hel o'r tŷ.

Ond fe roedd Glyn yn edrych yn siomedig a dechreuodd cystadleuydd arall Aisleyne wylo.

Mi roedd o fel brawd i mi Imogen Thomas am Glyn Wise

Cafodd Imogen groeso cynnes gan y dorf wrth adael y tŷ.

Dywedodd wrth gael ei holi gan y gyflwynwraig Davina McCall nad oedd hi'n poeni fod y cyhoedd wedi pleidleisio i gadw Richard.

"Mi fyswn i wedi hoffi bod yn y tŷ tan y diwedd ond mi roeddwn yn colli fy nheulu," meddai.

Dywedodd mai Glyn oedd ei ffrind gorau yn y tŷ, gan gyfadde mai'r cysylltiad Cymreig oedd un o'r rhesymau dros hynny.

'Glyn i ennill'

"Mi roedd o fel brawd i mi," meddai.

Ychwanegodd ei fod eisiau i'r Cymro ifanc ennill y gystadleuaeth pan ddaw i ben yr wythnos nesa.

Dywedodd ei thad Charles Thomas cyn canlyniad y bleidlais ei fod yn ofni mai hi oedd y ffefryn i adael.

Mae yntau hefyd am weld Glyn yn ennill.

"Mae'r berthynas rhwng Imogen a Glyn wedi tyfu dros yr wythnosau diwetha, maen nhw mwy fel brawd a chwaer," dywedodd.

Doedd Glyn, 18, ddim yn wynebu pleidlais y cyhoedd yr wythnos yma ond mae'r Brawd Mawr wedi ei "gosbi'n llym" nos Wener am dorri rheolau trwy fynd ar ben to'r tŷ ganol yr wythnos.

Ceisio cyrraedd cyd-gystadleuwyr yn y 'tŷ drws nesa' oedd y Cymro.

Ni chafodd chwarae unrhyw ran yn y drafodaeth wrth i'r cystadleuwyr benderfynu i adael i Nikki Grahame ddychwelyd i'r tŷ.