BBC Home
Explore the BBC
Chwiliwch yn Gymraeg
---------------
---------------
---------------
BBC Vocab
OFF / I FFWRDD
» Turn ON
Troi YMLAEN
» What is VOCAB? Beth yw GEIRFA?
SAFLEOEDD
ERAILL BBC
---------------
NEWYDDION
MEWN IEITHOEDD ERAILL
Arabic
Espanol
Russian
Chinese
Diweddarwyd: Dydd Gwener, 11 Awst 2006, 20:59 GMT 21:59 UK
Medal wyddoniaeth i Eirwen
Dr Gwynn a Hugh Thomas
Derbyniodd Dr Gwynn y Fedal gan Lywydd Llys yr Eisteddfod Hugh Thomas

Gwraig o Dal-y-bont, Ceredigion, sy'n derbyn Medal Gwyddoniaeth a Thechnoleg yr Eisteddfod.

Ganed Eirwen Meriona Gwynn yn Lerpwl cyn i'w rheini symud y teulu i Langefni.

Derbyniodd hi'r fedal mewn seremoni arbennig ar y maes.

Hi oedd y ferch gynta i ennill doethuriaeth mewn Ffiseg ym Mhrifysgol Bangor.

Roedd wedi graddio ym maes Crisialeg Pelydrau-X yn 1940.

Bu'n ymchwilydd gwyddonol, athrawes ffiseg, archwilydd adran o'r gwasanaeth gwladol yn Llundain, yn ffermio, yn ddarlithydd i Gymdeithas Addysg y Gweithwyr ac Adran Allanol y Brifysgol am 25 mlynedd, yn athro-drefnydd amser llawn i Gymdeithas Addysg y Gweithwyr am 10 mlynedd.

Diddordebau eang

Mae wedi rhoi llawer o ddarlithiau ac wedi darlledu'n aml.

Hi yw cyn-lywydd y Gymdeithas Wyddonol Brydeinig ac mae'n aelod er anrhydedd o Orsedd y Beirdd.

Mae'n gyn-aelod o Lys y Llyfrgell Genedlaethol, Cyngor Ymgynghorol dros Addysg, Llys y Brifysgol ac o Bwyllgor Sefydlog Urdd y Graddedigion. Mae'n Gymrodor o Brifysgol Bangor.

Tu allan i faes gwyddoniaeth mae ei diddordebau'n eang - enillodd gystadleuaeth ddrama'r BBC, y stori fer yn yr Eisteddfod Genedlaethol a dangoswyd ei lluniau yn yr Arddangosfa Gelf a Chrefft.

1,400 o erthyglau

Mae'n awdur tua 1,400 o erthyglau ar bynciau gwyddonol, yn bennaf yn Y Cymro, Y Faner, Y Gwyddonydd a chylchgronau eraill ac mewn llyfrau megis Gwyddonwyr y Byd, Cell Gymysg o'r Genedlaethol, Cyffro ein Canrif, Y Traddodiad Rhyddiaith yn yr 20fed Ganrif.

Bu'n awdur a chyflwynydd degau o raglenni radio a 12 rhaglen deledu.

Yn ddiweddar, roedd yn un o awduron a chyd-olygydd Ein Canrif, 100 mlynedd o hanes ardal Ceulanmaesmawr, (Talybont, Ceredigion) cyfrol ddwyieithog tua 600 tudalen wedi'i chyhoeddi yn 2005.




Steddfod Genedlaethol 2006

ABERTAWE A'R CYLCH 2006

O'R MAES

CEFNDIR

YR ORSEDD

O'R ARCHIF

GWEFAN



Gwasanaethau ebost | ticer newyddion | Amodau Defnyddio | Preifatrwydd a Chwcis


Yn ôl i'r brig ^^