Plaid Cymru: 'Llanw'n troi'?

Ieuan Wyn Jones: 'Angen agwedd newydd at wleidyddiaeth '

Ar ddiwedd cynhadledd wanwyn bydd arweinwyr Plaid Cymru â delwedd newydd yn gobeithio fod lle i fod yn fwy optimistaidd.

Bu'r pum mlynedd ddiwethaf yn "anodd" a lleihaodd nifer y pleidleiswyr ers 1999 ond mae'r arweinwyr yn gobeithio fod systemau a phobl newydd yn golygu bod y llanw'n troi.

Mae gan y blaid uned ymgyrchu a chyfarwyddwr ymgyrchu newydd ac erbyn diwedd y gynhadledd ddydd Sul yng Nghaerfyrddin dylai fod wedi penderfynu pwy fydd yr arweinydd swyddogol.

Y disgwyl yw mai Ieuan Wyn Jones, arweinydd y blaid yn y cynulliad, fydd yn arweinydd swyddogol dair blynedd wedi iddo ildio'r awenau.

Ei nod fydd nid dim ond datrys problemau mewnol ond cychwyn "cyfnod mwy positif" yng ngolwg y cyhoedd.

'Newid'

"Mae angen i araith yr arweinydd apelio at gynrychiolwyr y gynhadledd a'r cyhoedd," meddai cyn y gynhadledd.

"Bydda i'n dweud fod y Blaid yn y broses o newid - logo newydd a delwedd newydd.

"Ond mae angen i ni fod yn fwy sylweddol na hynny, mae angen agwedd newydd at wleidyddiaeth ac adennill ymddiriedaeth yr etholwyr."

Bydd y triban yn cael ei ddisodli

Mae'r blaid wedi gollwng y triban, ei logo ers 70 mlynedd, symbol hynaf unrhyw blaid yng ngwledydd Prydain.

Cafodd y logo ei gomisiynu yn 1933 a'i gynllunio gan Richard Huws ac roedd yn darlunio gwerthoedd pwysig y blaid, hunanlywodraeth, ffyniant economaidd a ffyniant diwylliannol.

Mae'r blaid wedi mabwysiadu pabi melyn yn lle'r triban.

Comisiynau

Hefyd mae'r gair "Cymru" wedi ei ollwng o deitl y blaid wrth iddi geisio ehangu ei hapêl.

Yn ystod y flwyddyn nesaf bydd polisïau newydd yn cael eu datgelu wedi i gomisiynau polisïau adrodd yn ôl.

A bydd y blaid yn portreadu ei hun fel yr unig ddewis i Lafur.

"Maen nhw'n anelu at hyrwyddo delwedd plaid sy ddim o angenrheidrwydd yn newydd ond un sy'n newid ac yn gwrando ar anghenion yr aelodau a'r cyhoedd," meddai'r sylwebydd gwleidyddol y Dr Non Gwilym.

Mae'n debyg y bydd y blaid yn ymosod ar record llywodraeth Rhodri Morgan, yn enwedig y methiant i roi gofal personol am ddim i'r anabl.

Bydd yn ceisio hawlio clod am nifer o gonsesiynau, gan gynnwys ffïoedd dysgu myfyrwyr.

Dywedodd yr arweinyddiaeth mai'r nod fyddai bod yn wir blaid Sosialaidd Cymru ac apelio at drwch y boblogaeth.

Ond os yw'r Blaid Geidwadol yn ennill tir, mae'n bygwth statws Plaid Cymru fel yr wrthblaid swyddogol ym Mae Caerdydd.