Christopher Painter: Enillydd Tlws y Cerddor
|
Christopher Painter o Gaerdydd sydd wedi ennill Tlws y Cerddor yn Eisteddfod Genedlaethol Eryri a'r Cyffiniau.
Gofynnwyd am gyfansoddiad gwreiddiol ar gyfer cyfuniad o rhwng tri ac wyth o offerynnau a gymer rhwng 8 a 12 munud i'w berfformio.
Yn ogystal â derbyn y tlws, rhodd Urdd Cerddoriaeth Cymru eto eleni, mae Christopher yn derbyn £500 sy'n cael eu rhoi gan Glwb Rotari Caernarfon.
Mae ysgoloriaeth gwerth £2,000 yn cael ei chynnig gan Sefydliad Cenedlaethol Cymru-America i hyrwyddo gyrfa'r cyfansoddwr buddugol.
Roedd 13 wedi cystadlu eleni a'r beirniaid oedd John Metcalf a Lynne Plowman.
'Lliwgar a meistrolgar'
Yn eu beirniadaeth dywedodd y ddau fod y gwaith buddugol, 'Yr Hanes Swynol.' yn "waith sy'n sefyll ar ei ben ei hun".
"Mae'n dechnegol sicr ac yn llawn dychymyg a syniadau cerddorol trawiadol," meddai'r feirniadaeth.
"Mae'n lliwgar, yn feistrolgar, ac wedi'i ysgrifennu'n dda ar gyfer yr ensemble."
Dywedodd y feirniadaeth fod y seiniau sy'n cael eu creu yn y darn "yn mynnu sylw ac er nad yw'n ddarn hawdd i'w chwarae, mae'r anawsterau wedi'u cloriannu'n fwriadus ac o fewn cyrraedd offerynwyr proffesiynol da".
Mae Mr Painter, a gafodd ei eni ym Mhort Talbot, yn diwtor rhan-amser ar gyfansoddi yng Ngholeg Cerdd a Drama Brenhinol Cymru ac yn Rheolwr Gyfarwyddwr Oriana Publications.
Bu'n arweinydd Cerddorfa Siambr Richmond a Gweithdy Opera Abertawe.
A bu'n astudio cyfansoddi gydag Alun Hoddinott ac ar gyrsiau Samuel Adler yn Efrog Newydd a Marek Stachowski yn Warsaw.
Astudiodd arwain gydag Edward Gregson a Christopher Adey.
Cymrodoriaeth
Mae wedi bod yn Gyfansoddwr mewn Cysylltiad ag Ensemble Cymru ac yn Gyfansoddwr Preswyl gyda Cherddorfa Ieuenctid Genedlaethol Cymru a Band Pres Ieuenctid Cenedlaethol Cymru.
Yn 1988 enillodd Dlws y Cerddor yn Eisteddfod Genedlaethol Casnewydd ac yn 1997 enillodd Wobr Cyfansoddwr Cymru Gregynog.
Dyfarnodd Cymdeithas Frenhinol y Celfyddydau Gymrodoriaeth iddo yn 2003.
Ar hyn bryd mae Mr Painter yn gweithio ar gyfansoddiad ar gyfer Cerddorfa Thueringen yn Yr Almaen.
Teitl y gwaith yw 'Forest of Dreams' ac fe fyddan nhw'n ei berfformio gyda'r arweinydd Cymreig, Alun Francis, yn Ionawr 2006.
Fe yw ysgrifennydd Urdd Cerddoriaeth Cymru ac mae'n aelod o Cyfansoddwyr Cymru.
Home
