Clod i dafarn Cymro yn Llydaw

Mae Byn Walters wedi byw yn Llydaw am 26 mlynedd

Mae Cymro sy'n cadw tafarn yn Llydaw wedi ei ganmol mewn llyfr arbennig am ei gwrw amrywiol.

Yn wreiddiol o Benydarren ym Merthyr Tudful, mae Bernard (Byn) Walters, 55 oed, wedi byw yn Llydaw am 26 o flynyddoedd.

Cafodd ei dafarn, Tavarn Ty Elise yn Plouye rhwng Carhaix a Huelgoat, tua 80 cilometr o borthladd Roscoff, glod yn Le Guide Du Routard.

Yn ogystal â chynnig cerddoriaeth fyw yn y dafarn draddodiadol mae bar Mr Walters yn cynnig pum math o wir gwrw.

"Mae gyda ni gwrw Llydaweg yn y dafarn sy'n dod o fragdy bach Brasserie des Deux-Rivières yn lleol," meddai.

"Ry'n ni'n cynnig cwrw neu 'coreff' fel mae'n cael ei alw yn Llydaweg."

Ym mar Ty Elise cychwynnodd y syniad i ddechrau gŵyl bop awyr agored fwyaf Ffrainc, Les Vieilles Charrues, 21 o flynyddoedd yn ôl.

Yn ogystal â chwarae cerddoriaeth Gymraeg mae ffrind Mr Walters, Meic Stevens, wedi perfformio'n gyson yn Nhy Elise.

Yn wreiddiol, roedd Mr Walters am deithio i Lydaw am bythefnos o wyliau gyda chriw o ffrindiau.

Ond cyfarfu â merch leol, ymgartrefu yno a chael dau o blant Dewi a Morwen. Bellach mae'n dad-cu am yr eildro.

Dywedodd ei fod yn teimlo'r un mor gartrefol yn Llydaw a Chymru a'i fod yn teithio'n ôl i dde Cymru i gwrdd â'i frawd pan fo'r hiraeth yn codi.