Sony: 650 yn colli gwaith

Mae mwy o alw am setiau sgrîn fflat

Mae cwmni Sony wedi cyhoeddi y bydd un ffatri yn cau a swyddi'n diflannu mewn ffatri arall.

Bydd 650 o swyddi'n diflannu wrth i ffatri Pen-y-bont ar Ogwr gau ac wrth i swyddi ddiflannnu yn ffatri Pen-coed.

Roedd y cyhoeddiad ddydd Mercher a dywedodd y cwmni fod mwy o alw am setiau teledu sgrîn gwastad yn lle'r rhai traddodiadol.

Mae cyfnod ymgynghorol wedi cychwyn.

Bydd 400 o swyddi yn cael eu colli yn ffatri Pen-y-bont ar Ogwr a 250 o swyddi eraill yn diflannu yn ffatri Pen-coed.

Daw'r cyhoeddiad ar ôl i 300 o weithwyr golli eu gwaith yn gynharach eleni.

Yn y Senedd ddydd Mercher dywedodd y Prif Weinidog Tony Blair ei fod yn flin am y cyhoeddiad am y swyddi ac addawodd y byddai'r llywodraeth yn ceisio helpu'r rhai fyddai'n colli eu gwaith.

Mae'r swyddi hyn o safon uchel ac roedden nhw'n bwysig iawn i'r economi lleol Janet Davies, AC Plaid Cymru

Mae swyddogion undeb wedi cynnal cyfarfodydd yn Sony ddydd Mercher.

Dywedodd Sony eu bod yn difaru ond bod y gostyngiad yn y galw am y setiau traddodiadol oedd yn cael eu cynhyrchu ym Mhen-y-bont wedi arwain at y penderfyniad.

"Mae disgwyl i'r swyddi gael eu colli o fewn blwyddyn.

"Byddwn ni'n gwneud popeth posib i ddal i ddatblygu safle Pencoed ac i ddatblygu sgiliau," meddai'r datganiad.

Hen-ffasiwn

Un o'r problemau y mae Pen-y-bont yn ei hwynebu yw bod y setiau teledu sy'n cael eu cynhyrchu yno yn tueddu i fod yn hen-ffasiwn.

Bydd gwaith cynhyrchu camerâu digidol a fideo yn parhau ym Mhen-coed.

Rhaid canolbwyntio ar helpu'r teuluoedd ac rydym yn galw ar y cynulliad i helpu Alun Cairns, AC Ceidwadol

Ym Mhen-y-bont mae'r gweithwyr yn cynhyrchu tiwbiau ar gyfer setiau traddodiadol tra bod ffatri Pen-coed yn eu gosod i mewn i'r setiau ar gyfer y farchnad ym Mhrydain.

Mewn datganiad dywedodd llefarydd ar ran Cyngor Sir Pen-y-bont ar Ogwr ei fod yn ddiwrnod trist i'r dref a de Cymru.

"Mae'r cwmni wedi bod yma am dros 30 mlynedd ac yn rhan o'r gymuned.

"Byddwn ni'n gwneud ein gorau i gydweithio â'r asiantaethau a Sony i sicrhau gwaith a chyfleoedd i'r rhai sy'n colli eu gwaith.

"Er bod diswyddiadau ym Mhen-coed mae 'na lygedyn o obaith eu bod nhw'n mynd i ddal i gynhyrchu yno."

Dywedodd Gweinidog Datblygu Economaidd y Cynulliad, Andrew Davies, fod ei feddyliau gyda'r rhai sy'n wynebu cael eu diswyddo.

"Fe fyddwn ni'n gwneud popeth y gallwn i'w helpu un ai i gael gwaith yn rhywle arall neu os oes angen i gael eu hail hyfforddi," meddai.

"Mae hwn yn benderfyniad masnachol gan Sony gan eu bod, yn ffatri Pen-y-bont yn gwneud hen ffurf o dechnoleg¿.ac nad oes galw amdano.

"Nid yw'n newyddion da ond rydyn ni wedi wynebu diswyddiadau sylweddol yn y gorffennol ac wedi rheoli'r rhai hynny'n effeithiol."

'Cam yn ôl'

Mae Janet Davies, AC Plaid Cymru ac aelod o'r Pwyllgor Datblygiad Economaidd, wedi dweud fod y penderfyniad yn "gam yn ôl" i ardal Pen-y-bont a Phen-coed.

"Mae'r swyddi yma o safon uchel ac roedden nhw'n bwysig iawn i'r economi lleol," meddai.

"Dwi'n gobeithio y bydd Andrew Davies (y Gweinidog Datblygu Economaidd) yn cynnig help i'r rhai fydd yn colli eu gwaith."

Dywedodd Alun Cairns, AC Ceidwadol, fod y newyddion yn ergyd i'r ardal ac i economi Cymru.

"Dwi'n siwr fod hon yn ergyd i'r ardal ehangach.

"Mae gan Sony enw da am dalu cyflogau da a hyfforddi gweithwyr i safon uchel iawn.

Mae 900 yn gweithio yn Sony ar hyn o bryd

"Hwn oedd y cwmni cynta o Japan i fuddsoddi yn ne Cymru ac roedd yn cyflogi dros 5,000 ar un adeg.

"Rhaid canolbwyntio ar helpu'r teuluoedd ac rydym yn galw ar y cynulliad i helpu."

Dywedodd AS Ogwr, Huw Irranca-Davies, ei fod yn siomedig iawn.

"Mae gan Sony weithlu teyrngar iawn ym Mhen-y-bont ac maen nhw wedi bod yn ymwybodol o'r gostyngiad yn y cynnyrch.

"Ond roedden nhw'n gobeithio dal i weithio am beth amser eto.

"Mae'r newyddion sydyn yn ergyd ac rydym yn cydymdeimlo â'r teuluoedd.

"... rhaid sicrhau'r cymorth gorau i sicrhau dyfodol hir-dymor Sony yn yr ardal."

Dywedodd Kirsty Williams, llefarydd y Democratiaid Rhyddfrydol ar ddatblygu economaidd, ei bod yn cydymdeimlo â'r gweithwyr ond hefyd beirniadodd y Gweinidog Datblygu Economaidd, Andrew Davies.

"Y tro diwethaf y gwnaeth ACau drafod diswyddiadau yn Sony fe honnodd y gweinidog ei fod wedi sefydlu tasglu i lunio cynllun ar gyfer gweithgynhyrchu, ond mae'n anodd nodi unrhyw weithredoedd sydd wedi bod o gymorth," meddai.

"Addawodd ymweld â Sony yn Japan ac eto heddiw mae'n cyfaddef na wnaeth y daith erioed. Mae ganddon ni bron i 16,000 yn llai o swyddi gweithgynhyrchu nag oedd ganddon ni yn 2001."