Mwy o draethau'n derbyn Y Faner Las

Mae 41 o draethau wedi derbyn y wobr yng Nghymru

Mae mwy o draethau Cymru wedi cael gwobr y Faner Las eleni er i'r nifer ar draws Prydain ostwng.

Y traethau yng Nghymru sy'n newydd ar y rhestr eleni yw Dale a Gogledd Aberllydan yn Sir Benfro, Penmaenmawr yng Ngwynedd a Chanol Prestatyn yn Sir Ddinbych.

Mae 41 o draethau i gyd wedi derbyn y wobr yng Nghymru gyda thair baner wedi eu rhoi i safleoedd lle mae marina.

Traethau Baner Las Cymru Aberporth, Ceredigion Abersoch, Gwynedd Gogledd Aberystwyth, Ceredigion Llanrhath, Sir Benfro Abermaw, Gwynedd Benllech, Ynys Môn Borth, Ceredigion Bae Bracelet, Abertawe Bae Caswell, Abertawe Bae Colwyn, Llandrillo-yn-rhos, Conwy Cricieth, Gwynedd Dale, Sir Benfro Dinas Dinlle (Morfa Dinlle), Gwynedd Y Friog, Gwynedd Gogledd Aberllydan, Sir Benfro Hafan, Pwllheli, Gwynedd (Marina) Bae Langland, Abertawe Llanddona, Ynys Môn Llanddwyn, Ynys Môn Lydstep, Sir Benfro Niwgwl, Sir Benfro Cei Newydd, Traeth Yr Harbwr, Ceredigion Parc Gwledig Pen-bre, Sir Gaerfyrddin Penmaenmawr, Conwy Traeth Poppit, Sir Benfro Porthcawl, Pen-y-bont ar Ogwr Porth Einon, Abertawe Canol Prestatyn Sir Ddinbych Pwllhelli, Marian y De, Gwynedd Porth Mawr, Tyddewi, Sir Benfro Saundersfoot, Sir Benfro Southerndown, Bro Morgannwg Marina Abertawe, Abertawe Castell Dinbych-y-pysgod, Sir Benfro Dinbych-y-pysgod - Traeth y Gogledd, Sir Benfro Dinbych-y-pysgod - Traeth y De, Sir Benfro Bae Trearddur, Ynys Môn Bae Trearddur - Porth Dafarch, Ynys Môn Bae Trecco, Pen-y-bont ar Ogwr Tywyn, Gwynedd Doc Fictoria, Gwynedd (Marina)

Dywedodd y trefnwyr fod y canlyniadau'n adlewyrchu'r buddsoddiad cynyddol yn y driniaeth o ansawdd dŵr afonydd a dŵr ymdrochi.

Cadwch Gymru'n Daclus sy'n rhoi gwobrau'r Faner Las ac ymysg y meini prawf mae glendid y traeth a'r dŵr a'r cyfleusterau sydd ar gael.

"Efallai nad yw'n heulog yma bob amser ond mae ganddon ni draethau sy'n lân a diogel," meddai Wynne Williams o Cadwch Gymru'n Daclus.

"Mae pobol am weld traethau o ansawdd y dyddiau hyn ac fe allwn ni gynnig yr ansawdd hwnnw.

Dywedodd rheolwr gyfarwyddwr Dŵr Cymru, Nigel Annett eu bod yn gwario miliynau o bunnoedd ar gynlluniau i wella ansawdd dŵr afonydd a dŵr ymdrochi.

"Rydym yn falch fod ei buddsoddiad yn arwain at fanteision i'n cwsmeriaid ac yn gymorth i sicrhau mwy o Faneri Glas i draethau Cymru," meddai

Mae'r gwobrau'n cael eu dyfarnu'n flynyddol mewn 32 o wledydd ar draws y byd.

Ymysg y safonau sy'n cael eu harchwilio mae rheolaeth dda ar lygredd, darparu gwybodaeth, rheoli cŵn a rheoli'r amgylchedd yn gynaliadwy.

Cafodd 119 o wobrau eu dyfarnu ym Mhrydain eleni o'i gymharu â 122 y llynedd. Cafodd Yr Alban a Gogledd Iwerddon wyth baner yr un.