BBC Home
Explore the BBC
Chwiliwch yn Gymraeg
---------------
---------------
---------------
BBC Vocab
OFF / I FFWRDD
» Turn ON
Troi YMLAEN
» What is VOCAB? Beth yw GEIRFA?
SAFLEOEDD
ERAILL BBC
---------------
NEWYDDION
MEWN IEITHOEDD ERAILL
Arabic
Espanol
Russian
Chinese
Diweddarwyd: Dydd Mawrth, 13 Rhagfyr 2005, 12:43 GMT
Ail wobr rwdlan i Rhodri
Rhodri Morgan
Rhodri Morgan: Yn ennill y wobr am yr eildro

Mae Prif Weinidog y Cynulliad wedi ennill "llwy bren" yr Ymgyrch Saesneg Clir unwaith eto a hynny am sylwadau yn y cynulliad am yr heddlu.

Roedd wedi ennill gwobr "Baglu dros eiriau" am y tro cyntaf wedi iddo ofyn i gyflwynydd rhaglen Newsnight y BBC, Jeremy Paxman: "Do one-legged ducks swim in circles?"

Y tro hwn mae'n ennill oherwydd y sylwadau canlynol yn Saesneg: "The only thing which isn't up for grabs is no change and I think it's fair to say it's all to play for, except for no change".

Ymysg enillwyr y wobr o'r blaen roedd Ysgrifennydd Amddiffyn America Donald Rumsfeld, yr arlunydd Tracey Emin a'r actorion Richard Gere ac Alicia Silverstone.

"Rydyn ni'n gobeithio nad yw'n credu fod hon yn enghraifft o gynnen bersonol yn ei erbyn," meddai Dave Smith o'r ymgyrch.

"Yn rhyfedd iawn, enillodd y tro diwethaf oherwydd sut y mynegodd ei ddymuniad i fod yn arweinydd y cynulliad ac, wrth gwrs, fe yw'r arweinydd erbyn hyn."

'Blwyddyn wan'

Roedd Mr Morgan wedi gwneud ei sylw yn 1998 pan ofynnodd Paxman iddo a oedd am ymgeisio am arweinyddiaeth y Blaid Lafur Gymreig.

Y rheswm am ei wobr ddiweddar oedd ei gyfraniad at y drafodaeth yn y cynulliad ar Dachwedd 15 am ddyfodol heddluoedd Cymru.

Ond dyw e ddim yn poeni am dderbyn y wobr.

"Enillais y wobr o'r blaen am y dyfyniad am yr hwyaden ungoes. Mewn gwirionedd, mae wedi gwneud enw i mi.

"Mae Jeremy Paxman yn dal i geisio darganfod a oes ystyr ddyfnach i'r hyn ddywedais i. Dyw'r wobr ddiweddaraf ddim yn yr un cae honno felly mae'n rhaid ei bod yn flwyddyn wan.

"Ond dwi wrth fy modd fod yr Ymgyrch Saesneg Clir yn edrych ar y cynulliad bob dydd Mawrth yn ystod y cyfnod holi gan aros am ddyfyniad tebyg i'r un am yr hwyaden ungoes," meddai.

'Creu problemau'

Y wobr 'Baglu dros eiriau' yw prif wobr yr ymgyrch ac mae gwobrau eraill am enghreifftiau da o bobl yn mwydro.

Er bod y gwobrau'n hwyl, roedd neges fwy difrifol, meddai llefarydd ar ran yr ymgyrch, Ben Beer.

"Mae pwynt difrifol sef bod jargon a malu awyr yn parhau, yn creu problemau i bobl," meddai.

"Nid yn unig mae ysgrifennu mewn Saesneg clir yn eich helpu i osgoi gwobr am rwdlan ond yn gallu arbed amser ac arian wrth gyfleu neges glir a chywir.

"Mae gan bawb yr hawl i wybodaeth gyhoeddus glir."




CYSYLLTIADAU RHYNGRWYD:
Dyw'r BBC ddim yn gyfrifol am gynnwys safleoedd rhyngrwyd allanol


Gwasanaethau ebost | ticer newyddion | Amodau Defnyddio | Preifatrwydd a Chwcis


Yn ôl i'r brig ^^