Roedd y rheolwr-gyfarwyddwr wedi dweud fod y protestwyr yn 'derfysgwyr'
|
Cafwyd pum aelod o Gymdeithas yr Iaith yn euog o achosi difrod troseddol wedi protest yng ngorsaf Radio Sir Gaerfyrddin.
Cafodd y pump ddedfryd o ryddhad amodol am 12 mis a bu rhaid iddyn nhw dalu £50 o gostau a £150 o iawndal yr un.
Y pump oedd cadeirydd y mudiad, Steffan Cravos o Gaerdydd, Gwenno Teifi o Lanfihangel-ar-Arth, Angharad Blythe o Gaerdydd, Llinos Dafydd o Sir Gaerfyrddin a Heledd Gwyndaf, is-gadeirydd y mudiad.
Clywodd Llys Ynadon Hwlffordd dystiolaeth ysgrifenedig rheolwr-gyfarwyddwr yr orsaf Keri Jones, gan gynnwys sylw fod y protestwyr yn "derfysgwyr".
Ond dywedodd y pum diffynnydd mai protest ddi-drais oedd hon am fod yr orsaf "yn gwadu bodolaeth y Gymraeg fel iaith fyw".
Clywodd y llys i 15 o brotestwyr fynd i mewn i'r orsaf yn Arberth naw mis yn ôl a thorri ar draws y darlledu.
'Sarhau'
Cafodd nifer fawr o bosteri "Lle mae'r Gymraeg?" eu gludo ar waliau, drysau, ffenestri a chyfrifiaduron wrth i'r protestwyr weiddi sloganau.
Honnodd un o gyflwynwyr yr orsaf oedd yn darlledu ar y pryd iddo gael ei sarhau gan nad oedd yn medru siarad Cymraeg.
Dywedodd Mr Cravos, cadeirydd y mudiad, wrth y llys iddyn nhw weithredu am mai "dim ond 3% o ddarlledu'r orsaf oedd drwy gyfrwng y Gymraeg".
Clywodd y llys fod difrod o £1,700 wedi ei wneud i offer a charpedi yn y stiwdio.
Home
