Dim golwg eto o'r Byd

Mae'r Byd yn gobeithio y bydd 7,000 o brynwyr y rhifyn ar gyfer y flwyddyn gyntaf

Mae wedi dod i'r amlwg y bydd yn flwyddyn arall o leiaf cyn y bydd Cymru'n cael papur newydd dyddiol yn y Gymraeg.

Dywed swyddogion papur Y Byd nad ydyn nhw hyd yma wedi codi digon o arian i ddechrau'r fenter.

Roedden nhw wedi disgwyl y byddai'r rhifyn cyntaf wedi ymddangos erbyn hyn ond maen nhw'n ffyddiog y byddan nhw'n cyrraedd y nod o £600,000 ac y daw'r papur yn fuan wedi hynny

Fydda i ddim yn enwi dyddiad achos mae'n ffôl i wneud hynny ond mae i gyd yn dibynnu ar pryd y cawn ni'r arian at ei gilydd Rebecca Williams, Swyddog Datblygu'r Byd

Mae rhai o'r buddsoddwyr hefyd yn dal i fod yn ffyddiog y bydd y papur yn dod i fodolaeth cyn bo hir.

Mae gan y Byd swyddfa bellach ond dim dwy sy'n gweithio yno ar hyn o bryd.

Mewn cyfweliad â BBC Cymru dros flwyddyn yn ôl awgrymodd cadeirydd y bwrdd rheoli y byddai'r papur mewn bodolaeth erbyn hyn.

Dywedodd Ned Thomas wrth y newyddiadurwr Gwilym Owen ei fod yn "weddol ffyddiog" y byddai'r Byd mewn bodolaeth erbyn diwedd Medi 2005.

Ond erbyn hyn does dim sôn yn union pryd y bydd y papur yn ymddangos.

Sefydlu swyddfa

"Fydda i ddim yn enwi dyddiad achos mae'n ffôl i wneud hynny ond mae i gyd yn dibynnu ar pryd y cawn ni'r arian at ei gilydd," meddai Rebecca Williams, Swyddog Datblygu'r Byd.

"O'r pwynt hwnnw bydd angen rhwng chwech a naw mis fwy na thebyg i sefydlu swyddfa, cyflogi golygydd a phawb arall sydd ei angen, gosod systemau a dechrau'r papur go iawn."

Dywedodd ei bod yn credu y bydd yn flwyddyn dda eto cyn y bydd y papur yn ymddangos.

Er hynny mae rhai o'r cyfranddalwyr yn parhau'n amyneddgar.

"Mae yna hysbyseb ar y teledu yn dweud fod y pethau gorau'n dod i'r rheiny sy'n aros ac rydyn ni i gyd sydd wedi buddsoddi yn awyddus i weld y Byd cyn gynted â phosib," meddai Morys Gruffydd sydd ymhlith y 300 o gyfranddalwyr sydd wedi cyfrannu o leia £500 i'r fenter.

Y gobaith yw y bydd 7,000 o brynwyr y rhifyn ar gyfer y flwyddyn gyntaf Y Byd a hynny'n codi i rhwng 12,000 a 15,000 ymhen pum mlynedd.

Mae angen codi £300,000 gan fuddsoddwyr ac maen nhw wedi cyflawni 90% o'r nod hwnnw ond bydd angen swm cyfatebol gan y sector masnachol.