Protest ar y copa yn erbyn cau ysgolion

Roedd degau o blant a rhieni wedi cerdded i'r copa i ddangos eu gwrthwynebiad

Mae rhieni a disgyblion tair ysgol sy'n wynebu cael eu cau yn Sir Gaerfyrddin wedi cynnal gorymdaith fel protest i un o gopaon ucha'r sir.

Roedd disgyblion ysgolion Mynyddcerrig, Bancffosfelen a Llangyndeyrn yn cerdded i gopa Mynyddcerrig ddydd Gwener.

Mae'r cyngor sir yn bwriadu cau hyd at 32 o ysgolion fel rhan o ad-drefnu addysg yn y sir.

Yn ôl y cyngor fe fydd £110m yn cael ei fuddsoddi er mwyn cael gwared ar yr hen adeiladau a gosod adnoddau newydd.

Dywedodd yr ymgyrchwyr o'r tair ysgol nad ydy'r awdurdod wedi dweud yn swyddogol wrthyn nhw y bydd yr ysgolion yn cau, ond maen nhw'n cael ar ddeall y bydd y plant yn cael eu hanfon i ysgol ym Mhontyberem sydd â llefydd gwag.

Dywedodd Matt Dicks, sydd ag un disgybl yn Mynyddcerrig ac un arall yn ymuno ar ôl y Pasg, y byddai cau'r ysgol yn drychinebus.

Ysgolion ardal

"Fe fydd ein plant yn cael eu cludo ar fysiau i ochr arall y cwm (Gwendraeth)," meddai.

Ychwanegodd Suzanne Morgan, mam i un o'r disgyblion: "Mae'r ysgol yn rhan ganolog o fywyd y pentref a dim ond drwy'r ysgol y mae nifer o rieni yn cwrdd.

"Rydym yn gorymdeithio i ddangos cryfder a'r cam cyntaf mewn brwydr hir os oes angen."

Dywedodd Cyngor Sir Caerfyrddin bod nifer o adeiladau'r sir mewn cyflwr trychinebus a bod nifer o lefydd gwag mewn ysgolion ac mae angen ad-drefnu sylweddol fel yr unig gam ymlaen.

Mae bygthiad y gall hyd at 32 o ysgolion gau ac yna fe fydd y sir yn sefydlu 18 o ysgolion ardal yn eu lle.

Dywedodd yr aelod yn y cabinet sydd â chyfrifoldeb am addysg, Mary Thomas: "Mae manteision sylweddol eisoes wedi cael eu gweld yn yr ardaloedd peilot ac fe fydd ymgynghoriad llawn a manwl yn cael ei gynnal ar unrhyw gynllun sy'n golygu newid."