Staff ysbyty yn protestio

Fe fu staff yn protestio y tu allan i Ysbyty Llwynhelyg

Mae staff a chleifion Ysbyty Llwynhelyg yn Hwlffordd wedi protestio ddydd Llun yn erbyn cynlluniau i leihau gwasanaethau.

Rhaid i Ymddiriedolaeth Iechyd Sir Benfro a Derwen, sydd mewn dyled o tua £11m, dalu £2.4m y flwyddyn yn ôl i Lywodraeth y Cynulliad tan 2009.

Ond gan fod y diffyg yn mynd yn ôl i 2004/5 mae'r bwrdd wedi cael gorchymyn i arbed tua £4m erbyn Ebrill nesaf.

Dywedodd yr ymddiriedolaeth mai "mesur dros dro" oedd y newid yn y gwasanaeth er mwyn sicrhau "cydbwysedd".

Byddai'r newidiadau yn golygu:

Colli 12 o sesiynau theatr yr wythnos yn Ysbyty Llwynhelyg

Cau pedwar gwely dibyniaeth uchel yn Llwynhelyg.

Cau pum gwely yn Ysbyty De Penfro

Dod â gofal dros nos i ben mewn unedau mân anafiadau yn Ysbyty Bwthyn Dinbych-y-Pysgod

Cau Ysbyty Dydd Cleddau

Dod â gwasanaeth nyrsio'r ardal dros nos i ben

Lleihau gwariant a gofal y rhai sy'n dirprwyo dros y meddygon

Lleihau costau rheoli

Rhoi'r gorau i ddefnyddio staff asiantaethau.

Mewn datganiad yr wythnos ddiwethaf dywedodd prif weithredwr dros dro yr ymddiriedolaeth, Mary Hodgeon, ei bod yn pryderu nad oes gan bobl y ffeithiau cywir am y trafodaethau sy'n digwydd ynglŵn â Llwynhelyg.

"Fel y Gwasanaeth Iechyd trwy Gymru rydyn ni'n edrych ar ffyrdd o newid sut mae pobl yn derbyn eu gofal iechyd," meddai.

"Dyw hynny ddim yr un fath â chwtogi gwasanaethau - mae'n bell o hynny."

Aeth ymlaen i ddweud nad oedd statws Llwynhelyg yn cael ei ostwng i statws ysbyty bwthyn.

"Rydyn ni'n ceisio gwella gallu'r ysbyty i ddarparu gwasanaethau allweddol i bobl Sir Benfro," meddai.

Yn ddiweddar bu'n rhaid i'r ymddiriedolaeth sicrhau'r cyhoedd na fyddai Ysbyty Bwthyn Dinbych-y-Pysgod yn cau i arbed arian ac y byddai'n parhau ar agor hyd nes y byddai ysbyty newydd wedi ei gwblhau yn 2007.

Pryder

Mae'r cyngor iechyd cymuned a gwleidyddion lleol wedi mynegi pryder ynglŷn â'r cynlluniau.

Rhyddhaodd Aelodau Cynulliad Sir Benfro, Christine Gwyther a Tamsin Dunwoody, ddatganiad ar y cyd yn lleisio eu pryder.

Maen nhw'n pryderu nad yw'n ymddangos fod meysydd lle gellid gwneud arbedion wedi eu nodi cyn i wasanaethau gael eu cwtogi.

"Rydyn ni i gyd yn deall fod yn rhaid gwneud penderfyniadau anodd weithiau," meddent.

"Ond ni ddylai'r penderfyniadau hyn fod ar draul gwasanaethau pwysig i gleifion Sir Benfro.

"Mae'r arbedion sydd wedi eu nodi yn y rhestr o doriadau, mewn rhai achosion, yn eithaf bach a gellid cwrdd â nhw drwy arbedion eraill a strwythur rheoli tynn.

"Mae'r cyngor iechyd cymuned wedi dweud na fydd yn cefnogi'r toriadau. Dydyn ni ddim chwaith. Mae'n amser i'r ymddiriedolaeth edrych eto ar y toriadau sy'n cael eu cynnig a gwneud mwy o ymdrech i warchod gwasanaethau cleifion."