Bys ar y botwm: Cynllun peilot
|
Mae ysgol uwchradd yng Nghymru'n defnyddio olion bysedd i gofrestru disgyblion fel rhan o gynllun peilot Prydeinig.
Ysgol Gyfun Bryntirion, Pen-y-bont ar Ogwr, yw un o'r ysgolion cyntaf ym Mhrydain i ddefnyddio technoleg newydd sy'n sganio olion bysedd disgyblion i nodi a ydyn nhw'n bresennol ai peidio.
Os yw'r cynllun peilot yn llwyddo, gallai'r system ddisodli'r dull traddodiadol o alw enwau yn y dosbarth a chadw cofrestr.
Disgyblion y chweched dosbarth sy'n cymryd rhan yn yr arbrawf. Mae sganiwr yn darllen ôl bys pob disgybl cyn gyrru neges i gyfrifiadur sy'n nodi eu bod wedi cyrraedd yr ysgol.
Bydd y dull yn golygu bod ysgolion a rhieni'n gwybod yn llawer iawn yn gynt pwy sydd yn yr ysgol a phwy sy'n absennol. Os nad yw disgybl yn bresennol, mae'r ysgol yn cysylltu'n syth a rhieni.
Triwantiaeth
Gall y system leihau triwantiaeth drwy gasglu gwybodaeth ar gyfer awdurdodau addysg.
"Mae'r disgyblion yn mwynhau defnyddio'r system," meddai pennaeth yr ysgol, Alwyn Thomas.
"Yn ystod y misoedd nesaf rydym yn bwriadu ei ddefnyddio drwy'r ysgol gyfan - bydd pob disgybl yn mynd i wersi a defnyddio'r sganiwr i gofrestru ar gyfer y wers honno.
"Felly os nad ydyn nhw yn y wers mae'r rhieni'n cael gwybod."
Byddai'r dechnoleg newydd yn lleihau gwaith gweinyddu mewn ysgolion.
Dywedodd rhai o ddisgyblion y chweched dosbarth bod ganddyn nhw fwy o amser yn yr ysgol o ganlyniad i ddefnyddio'r peiriant.
"Dwi'n credu bod hyn yn rhoi mwy o gyfle i ni gymdeithasu yn y bore a dwi'n meddwl ei fod yn syniad da, fel y rhan fwyaf o'r flwyddyn," meddai Emily Boobyer, un o'r disgyblion.
Dywedodd Rhiannon Williams, disgybl arall, nad oedd yn pryderu bod yr ysgol yn cadw cofnod o'i ôl bys.
O dan y cytundeb baich gwaith ddaeth i rym eleni, ni ddylai athrawon orfod gwneud tasgau beunyddiol fel cadw cofrestr a chasglu arian cinio.
Home
