Gwasanaethau brys: Yn gadael Ysbyty Singleton mewn 10 mlynedd?
|
Mae ymgynghorydd o blaid cynlluniau i uno gwasanaethau brys yn Abertawe a chreu ysbyty anferth.
Dywedodd Dr Dewi Evans, ymgynghorydd plant yn Ysbyty Singleton, y byddai canoli gwasanaeth iechyd y ddinas yn "well defnydd o arian".
Mewn cyfarfod ddydd Mercher mae'r ymddiriedolaeth iechyd yn ystyried sut mae cynnig y ddarpariaeth orau, allai gynnwys ysbyty anferth yn lle dau.
Mae'r argymhellion yn cynnig symud y gwasanaethau brys o Singleton i Dreforys o fewn 10 mlynedd.
Dywedodd yr ymddiriedolaeth ei bod yn edrych ar yr holl opsiynau ac na fyddai cynlluniau pendant am flwyddyn.
Bydd misoedd o gyfarfodydd ymgynhori rhwng staff, cleifion a phartneriaid eraill.
Mae Dr Evans wedi dweud fod creu un ysbyty anferth yn gwneud mwy o synnwyr na chael dau ysbyty chwe milltir ar wahân.
"Mae'n well cael y meddygon a'r staff i gyd o dan un to," meddai.
'Arwynebol'
"Ac mae'n well i'r cleifion gan fod yr holl wasanaethau a'r arbenigedd yn yr un lle - mae'n fwy effeithiol ac yn well defnydd o'r arian."
Mae argymhelliad yn golygu y bydd Ysbyty Singleton yn cynnig gwasanaeth gofal dydd, ychydig o lawdriniaeth ac uned gofal dwys.
Byddai achosion brys ag angen gofal ac achosion cymhleth fyddai angen llawdrinaeth yn symud i Ysbyty Treforys.
Ond dywedodd Dai Lloyd, AC Plaid Cymru ar gyfer Gorllewin De Cymru, fod apêl yr argymhellion yn "arwynebol".
Dr Evans: Un ysbyty anferth 'yn fwy effeithiol'
|
"Mae angen gwell gwasanaethau ar y ddau gan fod y rhestrau aros yn faith."
"Byddai unrhywun yn edrych ar Abertawe o'r tu allan yn teimlo fod dinas â phoblogaeth sy'n llai na 250,000 yn ei chael hi'n anodd i gyfiawnhau dau ysbyty mawr," meddai adroddiad cychwynnol.
Dywedodd llefarydd ar ran yr ymddiriedolaeth y byddai'r argymhellion yn ystyried y gwasanaeth iechyd gorau i Abertawe yn y ganrif hon.
"Bydd y prosiect wedi ei seilio ar wasanaethau clinigol nid adeiladau."
A bydd unrhyw gais am newidiadau yn gorfod cael eu cyflwyno i'r cynulliad erbyn Hydref 2006.
Home
