Mae taith Julian Lewis Jones yn mynd o Lanelli i Borthaethwy
|
Yn lle troedio'r llwyfan mae un o actorion Cymru yn cerdded o'r de i'r gogledd i godi arian ar gyfer apêl tsunami Asia.
Mae Julian Lewis Jones, seren Where The Heart Is a chyfres BBC Cymru, Belonging, yn cerdded 200 milltir o Lanelli i Ynys Môn.
Cychwynnodd y daith ddydd Sul o Barc y Strade yn Llanelli ac mae'n gobeithio cyrraedd Clwb Rygbi Porthaethwy ddydd Llun.
Mae'n codi arian ar y ffordd ac wrth fynd o un cae rygbi i'r llall.
Yn wreiddiol o Ynys Môn mae'n wyneb cyfarwydd ar ddramâu teledu Cymraeg fel Y Palmant Aur a Tipyn o Stad.
Dywedodd ei fod yn hoff iawn o rygbi ac iddo gychwyn ei daith wedi gêm bwysig y Cochion ddydd Sul yn erbyn Northampton yng Nghwpan Heineken.
Y Cochion enillodd.
Tysteb
Fe fydd y daith yn dod i ben ym Mhorthaethwy oherwydd y cysylltiad rhwng Llanelli a Môn, hynny yw'r bachwr Robin McBryde.
"Roeddwn yn teimlo fod rhaid i mi wneud rhywbeth i helpu'r apêl," meddai'r actor.
"Dwi'n ffan o'r Scarlets a gan ei bod yn flwyddyn dysteb i Robin - pam ddim cerdded o'r Strade i Borthaethwy?
"Er ei bod yn dipyn o dasg, mae'n un dwi'n benderfynol o'i gwneud.
"Mae'r drychineb yma wedi effeithio ar gymaint ac wedi cyffwrdd â chalonnau pobl ar draws y byd."
Ddydd Iau roedd yr actor yn cerdded drwy Rhydypennau ger Aberystwyth a'r arian yn llifo i'r gronfa.
"Dwi o leia' hanner ffordd. Mae'r traed yn dal i fynd ac mae'r ymateb wedi bod yn wych," meddai Jones.
"Mae pobl wedi bod yn dod allan i'n cefnogi a 'dan ni wedi llwyddo i godi £7,000 hyd yn hyn."
Ei gyfaill, yr actor Craig Rogan, sy'n ei gefnogi ar y daith.
"Mae angen y rhai sydd wedi dioddef oherwydd y tsunami wedi cyffwrdd â phawb," meddai Llywydd Undeb Amaethwyr Cymru, Gareth Vaughan.
"Ac mae maint yr arian sydd wedi cael ei godi gan bobl Cymru yn aruthrol.
"Mae'r undeb yn dymuno chwarae ei ran a dyna pam ein bod ni'n noddi Julian ac yn gofyn i bawb sy'n gefnogol i roi arian drwy'r swyddfeydd yr undeb yn lleol."
Garej Gravell's yng Nghydweli, Grŵp Adeiladu WRW a sawl gwesty sy'n noddi'r daith.
Home
