Gweinyddwyr: Camau cyntaf

Mae dau gais gan y cefnogwyr i brynu'r clwb wedi ei wrthod

Mae cyfarwyddwyr Clwb Pêl-Droed Wrecsam yn dweud eu bod yn anelu at roi'r clwb yn nwylo'r gweinyddwyr.

Dyled y clwb yw £800,000 mewn trethi ac mae Cyllid y Wlad i fod i ofyn i'r Uchel Lys ddod â'r clwb i ben ddydd Mercher.

Mae dau gyfarwyddwr, David Bennett a David Griffiths, wedi dweud mai rhoi'r clwb yn nwylo'r gweinyddwyr oedd yr ateb gorau yn lle gadael iddo gael ei ddileu.

"Byddwn yn deisebu'r Uchel Lys ac yn troi pob carreg i sicrhau y bydd y clwb yn goroesi," meddai'r ddau.

Rydym yn barod i ymladd hyd y pen i achub Clwb Pêl-Droed Wrecsam Mark Guterman, cyn-gadeirydd Wrecsam

Mae'r cyn-gadeirydd, Mark Guterman, yn ceisio prynu'r clwb oddi wrth y perchennog, Alex Hamilton.

Eisoes mae Mr Hamilton wedi gwrthod dau gynnig i brynu'r clwb oddi wrth ymddiriedolaeth y cefnogwyr.

Pe bai'r clwb yn cael ei roi yn nwylo'r gweinyddwyr, gallai clwb hynaf Cymru golli 10 pwynt yn y gynghrair ac mae'n bosib y gallai rhai o'r chwaraewyr gorau gael eu gwerthu.

Ddydd Sadwrn cariodd cefnogwyr Wrecsam arch ffug cyn y gêm yn rownd gyntaf Cwpan yr FA yn erbyn Hayes.

Enillodd y Dreigiaid o 4-0.

Tymor byr

Pe bai'r clwb yn mynd i ddwylo'r gweinyddwyr yn wirfoddol cyn gwrandawiad llys ddydd Mercher, gallai weithredu yn y tymor byr.

Dywedodd arweinydd cyngor Wrecsam, y Cynghorydd Neil Rogers, y dylai'r clwb barhau "fel clwb pêl-droed proffidiol" ac mae disgwyl iddo gyfarfod â'r Gweinidog Chwaraeon, Alun Pugh, yn y cynulliad ddydd Iau.

Cyn gêm dydd Sadwrn dywedodd Mr Guterman wrth BBC Cymru nad oedd ei gynnig diweddara "wedi ei dderbyn na'i wrthod".

Mae cefnogwyr yn bryderus am ddyfodol y clwb

"Y prawf terfynol fydd a wnaiff dderbyn y cynnig ai peidio," meddai.

"Rydym yn barod i ymladd hyd y pen i achub Clwb Pêl-Droed Wrecsam ac mae 'na obaith o hyd.

"Fyddwn ni ddim yn ildio."

Mae Ymddiriedolaeth Cefnogwyr y Clwb yn erbyn bwriad Mr Guterman i redeg y clwb.

Mewn datganiad dywedodd yr ymddiriedolaeth mai'r unig ateb oedd mynd i ddwylo'r gweinyddwyr yn wirfoddol gan fod hynny "yn cynnig cychwyn ffres i Wrecsam a'r cynnig gorau i barhau yn y tymor hir".

'Gwneud elw'

Mae AS Wrecsam, Ian Luacs, wedi dweud nad oedd yn credu fod Mr Hamilton am werthu'r clwb.

"Yn fy marn i, mae modd i'r clwb redeg a gwneud elw ond y ddyled sydd wrth wraidd y problemau," meddai.

Dywedodd rheolwr y clwb, Denis Smith, ei fod yn credu nad gêm dydd Sadwrn oedd yr olaf.

"Ddylai personoliaethau ddim effeithio ar yr hyn sy'n digwydd. Mae'n rhaid sicrhau dyfodol i'r clwb."

Dros y Sul dywedodd cyn-reolwr y tîm, Brian Flynn, y byddai'n "warthus" pe bai'r clwb yn diflannu.