Y Cymro ar newydd wedd

Mae'r cwmni yn gobeithio y bydd y cylchrediad yn cynyddu

Fe fydd un o bapurau Cymraeg enwog Cymru yn cael ei ail-lansio yr wythnos hon.

Bydd Y Cymro'n cael ei ail-lansio yng Ngwesty Portmeirion ger Porthmadog ddydd Mercher gan berchennog newydd, Y Cambrian News,

Nod y cwmni yw codi cylchrediad y papur ond mae rhai'n amau a fydd hynny'n bosib oherwydd cynlluniau i gyhoeddi papur Cymraeg dyddiol.

Sefydlwyd Y Cymro dros 70 o flynyddoedd yn ôl ac ar un adeg roedd yn boblogaidd iawn ymhlith darllenwyr Cymraeg.

Un o olygyddion Y Cymro oedd John Roberts Williams a fu farw ychydig wythnosau yn ôl.

Chwe mis yn ôl cafodd cwmni'r papur ei werthu i gwmni'r Cambrian News sy am roi stamp newydd ar y papur ac adennill peth o'r hen ogoniant.

Cylchrediad

Dywedodd y cwmni y byddai mwy o ddarpariaeth i ddysgwyr a mwy o newyddion Ewropeaidd.

Y gobaith, meddai, yw y bydd hyn yn arwain at godi cylchrediad.

"Mae dyfodol Y Cymro yn gadarn a bydd y papur yn sefyll ar ei draed ei hun, " meddai Lis Owen Jones, Prif Weithredwr y Cambrian News.

"Gallai'r cylchrediad fod yn uwch. Mae o gwmpas 4,000 ac mae wedi bod yn 20,000 yn y gorffennol.

Ein gobaith ni yw ei godi i oddeutu 10,000."

Eisoes mae papurau a chylchgronau Cymraeg wedi dibynnu ar siopau Cymraeg i ddosbarthu eu cynnyrch ond mae'r Cymro am newid y trefniadau dosbarthu.

'Cystadleuaeth'

Mae rhai'n amau a oes lle i fersiwn newydd o'r Cymro a phapur dyddiol newydd.

"Bydd cystadleuaeth ond dwi'n meddwl y byddwn ni'n gallu delio â hynny," meddai Myfanwy Griffiths o'r Cymro.

"Does dim yn bod efo'r syniad o gael papur dyddiol Cymraeg ond mae angen marchnata ac mae angen darllenwyr ar eu cyfer hefyd."