Addysgu myfyrwyr yn yr Ardd Fotaneg

Y bwriad yw cynal cyrsiau garddio yn yr ardd o fis Medi

Bydd hwb i Ardd Fotaneg Genedlaethol Cymru o ganlyniad i gytundeb newydd gyda Choleg Sir Gâr.

Dydd Mawrth fe fydd y coleg yn cyhoeddi y bydd yn cynnal cyrsiau garddio yn yr atyniad yn Llanarthne o fis Medi.

Mi fydd y cynllun yn rhoi cyfle i fyfyrwyr ddatblygu sgiliau tra'n cefnogi a gweithio gyda staff yn yr ardd.

Fe fydd manylion y cytundeb yn cael eu cyhoeddi'n swyddogol yn y Sioe Fawr yn Llanelwedd.

Mae Rob Taylor, darlithydd garddio yng Ngholeg Sir Gâr, wedi croesawu'r cyfle i gryfhau cysylltiadau gyda'r ardd.

"Yn y pen draw, dwi'n credu y byddwn ni'n mynd o nerth i nerth," meddai.

"Bydd addysg mewn garddio yng Nghymru yn tyfu a bydd hyn yn ei dro yn golygu y bydd pobol ifanc yn gallu, gobeithio, gweithio mewn busnesau a fydd yn helpu Cymru hefyd."

Dywedodd Rhodri Griffiths, rheolwr yr Ardd Fotaneg Genedlaethol ei fod yn falch o gael ffurfio partneriaeth gyda'r coleg.

"Dyma enghraifft wych o'r cyfleoedd addysgol y mae'r ardd yn eu cynnig," meddai.

Yn gynharach eleni cafodd yr ardd ei hachub wedi iddi ddioddef problemau ariannol difrifol.

Mae'r cytundeb ar gyfer y flwyddyn sydd i ddod yn cynnwys £300,000 yr un gan Gyngor Sir Caerfyrddin, Comisiwn y Mileniwm a Llywodraeth y Cynulliad.