Ofcom yn rhybuddio gorsaf radio

Mae Radio Sir Gâr yn darlledu o Narberth yn Sir Benfro

Mae Radio Sir Gaerfyrddin wedi cael rhybudd oddi wrth Ofcom, y corff sy'n cadw golwg ar y diwydiant darlledu, wedi cwynion am ddiffyg darpariaeth Gymraeg yr orsaf.

Cafodd ymchwiliad ei lansio ar ôl i ymgyrchwyr iaith honni fod rheolwyr yr orsaf wedi torri addewidion.

Mae Ofcom wedi galw ar Radio Sir Gâr i weithredu ar frys.

Mewn datganiad yng nghyfarfod Pwyllgor Diwylliant y Cynulliad dywedodd cyfarwyddwr Ofcom yng Nghymru, Rhodri Williams: "Awgrymodd ein monitro fod swm yr iaith Gymraeg a ddarlledir gan yr orsaf yn ystod oriau'r dydd yn llai na'r hyn a gynigiwyd.

Ry'n ni heddiw wedi rhoi rhybudd cerdyn melyn i'r orsaf gan nodi ein pryderon Rhodri Williams, Cyfarwyddwr Ofcom yng Nghymru,

"Rydyn ni wedi gofyn i'r orsaf i roi sylw i hyn.

"Fodd bynnag rydyn ni'n pryderu'n fwy am absenoldeb llwyr cerddoriaeth Gymraeg o'r sioe gyda'r nos gan ei bod yn ymddangos fod hyn yn torri'r addewid yn amlwg.

"Mae gan Ofcom ystod o bwerau i osod sancsiynau statudol yn erbyn ei ddeiliaid trwydded sy'n cynnwys, mewn cyfyngder, gosod cosb ariannol neu fyrhau neu ddileu'r drwydded.

"Ry'n ni heddiw wedi rhoi rhybudd cerdyn melyn i'r orsaf gan nodi ein pryderon a gofyn iddi ddatrys y problemau yma yn gyflym ac yn effeithiol."

Yn y cyfamser, mae dyfodol darlledu yng Nghymru yn cael sylw mewn cynhadledd yng Nghaerdydd nos Fercher.

Cynhadledd Llais y Gwrandawr a'r Gwyliwr (VLV) yw hon.

Ymysg y rhai yn y gynhadledd mae penaethiaid S4C ac ITV yng Nghymru, cynrychiolydd o BBC Cymru a phennaeth Ofcom Cymru.