Gig yn erbyn 'diffyg Cymraeg'

Roedd Lo Cut a Sleifar yn perfformio nos Wener

Cynhaliwyd gig yng Nghaerfyrddin nos Wener yn erbyn y ddarpariaeth Gymraeg ar Radio Sir Gâr.

Yn Neuadd San Pedr roedd bandiau Cymraeg yn chwarae fel protest yn erbyn diffyg cerddoriaeth leol a Chymraeg ar yr orsaf.

Nod y gig, meddai'r trefnwyr, oedd dangos fod bandiau Cymraeg yn yr ardal ond bod hyn ddim yn cael ei adlewyrchu ar yr orsaf radio.

Yn noson Herio'r Welsh Not roedd Lo Cut a Sleifar, band Steffan Cravos sy'n wreiddiol o Gaerfyrddin ac a oedd mewn protest yn yr orsaf radio yng Ngorffennaf.

Roedd Mattoidz, band o'r ardal, hefyd yn perfformio ynghyd â Java o Lanbed, Rasputin o Landysul, Garej Dolwen o Grymych a DJ Ian Cotrell.

Bydd y gig yn dangos fod diwylliant Cymraeg yma a bod angen i Radio Sir Gâr ei gynnwys Heledd Gwyndaf, Cymdeithas yr Iaith

"Mae Radio Sir Gâr yn gwrthod caneuon Cymraeg bandiau lleol," meddai Heledd Gwyndaf, swyddog rhanbarthol Cymdeithas yn Sir Gaerfyrddin.

"Dyw'r darllediadau ddim yn ddwyieithog. Mae tua 50% o boblogaeth Sir Gaerfyrddin yn siarad Cymraeg ac mae llai na 3% o ddarllediadau'r orsaf yn Gymraeg."

Honnodd fod un rhaglen oedd i fod yn Gymraeg ond mai dim ond ond wyth munud o Gymraeg oedd arni.

"Dyw'r orsaf yn amlwg ddim yn gwasanaethu anghenion y sir yn ieithyddol.

'Mwy o raglenni'

Doedd rheolwr gyfarwyddwr yr orsaf radio, Keri Jones, ddim ar gael i roi sylw ddydd Gwener.

Ond mae wedi dweud fod yr orsaf yn darlledu mwy o raglenni Cymraeg nag oedd yn ofynnol yn y cytundeb gydag Ofcom, y corff sy'n rheoli gorsafoedd radio preifat.

"Rydym yn gweithio'n agos gyda mentrau iaith Sir Gaerfyrddin sy'n darlledu rhaglen wythnosol ar yr orsaf," meddai Mr Jones.

Yng Ngorffennaf cafodd 11 o aelodau Cymdeithas yr Iaith eu harestio mewn protest yn stiwdio'r orsaf yn Arberth.