Lois Arnold: Ei bywyd wedi newid yn llwyr ers iddi ddysgu Cymraeg
|
Lois Arnold, y mae ei bywyd wedi newid yn llwyr, yw Dysgwraig y Flwyddyn.
Y ddynes o'r Fenni ond yn wreiddiol o Loegr enillodd y gystadleuaeth yn yr Eisteddfod nos Fercher.
Yr wythnos hon mae'r awdur cyfrol o straeon byrion i ddysgwyr wedi bod yn codi arian ar gyfer y Brifwyl.
"Mae fy mywyd i wedi newid yn llwyr ers i mi ddysgu Cymraeg. Doeddwn i ddim yn disgwyl i hynny ddigwydd ond mae wedi bod yn wych.
"Dwi wedi cael croeso mawr gan y gymuned Gymraeg a dwi wedi bod yn gwneud llawer o waith codi arian at yr Eisteddfod Genedlaethol.
"Dwi ar bwyllgor Eisteddfod Y Fenni a dwi'n canu mewn côr Cymraeg."
'Yn lwcus iawn'
Mae'n diwtor Cymraeg ail iaith ym mro'r Eisteddfod.
"Dechreuais i ddysgu yn syth wedi i mi symud i Gymru o Fryste.
"Roeddwn i'n lwcus iawn i fyw yng Ngwent gan fod y ddarpariaeth mor dda i bobol sydd ishe dysgu Cymraeg.
"Es i i ddosbarthiadau nos i ddechrau ac ysgolion undydd.
"Rhyw chwe blynedd yn ôl y dechreuais i a bellach dwi'n dysgu fel tiwtor ac felly dwi'n ceisio lledu'r neges i bobol eraill."
Wedi ymweliad yr Eisteddfod â Chasnewydd yn 1988 mae nifer yn yr ardal wedi bod yn dysgu'r iaith ac mae nifer yr ysgolion cynradd wedi cynyddu.
"Mae yna bryder, yn enwedig gan fod cymaint o bobol ishe dysgu," meddai.
"Mae brwdfrydedd mawr yng Ngwent ar gyfer dysgu Cymraeg, yn enwedig nawr gan fod yr Eisteddfod yma ac mae angen rhagor o diwtoriaid.
Home
