Papur dyddiol 'mewn blwyddyn'

Jon Gower Gohebydd Celfyddydau a Chyfryngau

Mae'r Byd yn chwilio am danysgrifwyr

Gallai papur dyddiol yn y Gymraeg gael ei gyhoeddi o fewn blwyddyn.

Dyna gasgliad astudiaeth dros y ddwy flynedd ddiwethaf.

Erbyn hyn, mae cefnogwyr y syniad wedi dechrau edrych am danysgrifwyr.

Y bwriad yw cyhoeddi Y Byd bum niwrnod yr wythnos.

Mae ymchwil Canolfan Mercator yn Aberystwyth wedi dangos y byddai traean cartrefi Cymraeg eu hiaith yn dymuno darllen papur dyddiol yn y Gymraeg.

Ac mae cwmni wedi cael ei sefydlu.

Dywedodd Ned Thomas o bapur Y Byd fod eu targedau'n realistig o ran gwerthiant.

Cefnogaeth a phryder

"Yn y tymor byr, yn y flwyddyn gyntaf, ry'n ni'n chwilio am 5,000 o danysgrifwyr a gwerthiant achlysurol o 2,000 yn y siopau.

"Ry'n ni'n meddwl fod modd i ni gyrraedd 15,000, falle mwy yn y pendraw."

O ran statws yr iaith Gymraeg a safle Cymru yn y byd, mae'n gyfle gwych ond o ran y byd busnes, dwi ddim yn gweld y syniad yn gweithio o gwbl Rob Jones

Mae Dylan Iorwerth, golygydd-gyfarwyddwr y cylchgrawn wythnosol, Golwg, yn croesawu'r fenter.

"Yn amlwg, byddai unrhyw un yn falch iawn o weld papur newydd dyddiol Cymraeg llwyddiannus.

"Ond mae rhywfaint o bryder y gallai'r ymgais ei hun wneud rhywfaint o ddrwg i beth sydd yno'n barod."

Honnodd Rob Jones, Golygydd Y Cymro, nad oedd digon o gynulleidfa ar gyfer papur dyddiol.

"O ran statws yr iaith Gymraeg a safle Cymru yn y byd, mae'n gyfle gwych ond o ran y byd busnes dwi ddim yn gweld y syniad yn gweithio o gwbl oherwydd dwi ddim yn credu bod 'na gynulleidfa i bapur dyddiol Cymraeg."

Yn ystod y misoedd nesa bydd ymgyrch i ddenu tanysgrifwyr i'r papur.