Bil plismona i'r Eisteddfod

Mae'n bosib y bydd yna dâl am y gwasanaeth ym Meifiod eleni

Mewn cyfnod sy'n anodd yn ariannol i'r Eisteddfod Genedlaethol, roedd yna ergyd arall iddi ddydd Mercher.

Mae Awdurdod Heddlu Dyfed-Powys wedi penderfynu fod yn rhaid i'r Eisteddfod dalu am blismona'r brifwyl yn Nhyddewi y llynedd.

Fe fydd y gost yn £10,000, ac mae'n bosib y bydd bil tebyg ar y ffordd wedi'r ymweliad â Meifod eleni.

Mae Heddlu Dyfed-Powys yn honni bod yr Eisteddfod yn gwrthod talu bil o £10,000 gafodd ei gyflwyno am eu gwasanaeth yn ystod yr wyl y llynedd.

Ond dywed Cyfarwyddwr yr Eisteddfod na wnaethon nhw erioed gytuno i dalu i'r heddlu.

Y wybodaeth oedd ganddon ni oedd na wnaethon ni gytuno i dalu am wasanaeth yr heddlu yn Eisteddfod Tyddewi Elfed Roberts, Cyfarwyddwr yr Eisteddfod Genedlaethol

Ar hyn o bryd mae unrhyw benderfyniad i godi tâl am ddigwyddiadau cyhoeddus yn cael ei wneud gan bennaeth rhanbarthol pob llu ar gyfer Powys, Ceredigion, Sir Gaerfyrddin a Sir Benfro,

Yn ôl y Prif Uwch-arolygydd Paul Amphlett, pennaeth rhanbarthol Sir Benfro, fe wnaeth gwyl Tyddewi gostio £30,000 i'r heddlu.

"Fe wnaethon ni benderfynu codi tâl o £10,000 i'r Eisteddfod oherwydd problemau gweinyddol, ond wnaethon ni ddim gyrru'r bil yn syth" meddai

Masnachol

Cafodd y bil am wyl 2002 ei yrru ddechrau mis Awst 2003.

"Mae'n anodd gwybod be i'w wneud efo'r Eisteddfod gan ei fod yn ddigwyddiad masnachol mae'n dibynnu'n helaeth ar gefnogaeth y gymuned leol.

"Dydy'r heddlu ddim mor fasnachol â rhai cyrff ond rydan ni'n cynnig gwasanaeth cyhoeddus.

"Rydan ni'n codi tâl ar ddigwyddiadau fel Gwyl Jazz Aberhonddu a Sioe Frenhinol Cymru.

"Rwan alla i ddim gweld y byddwn ni'n pwyso am yr arian gan yr Eisteddfod."

Dywedodd Cyfarwyddwr yr Eisteddfod, Elfed Roberts, na wnaeth y mudiad gytuno i dalu am y gwasanaeth.

"Mae 'na gamddealltwriaeth wedi bod," meddai.

"Y wybodaeth oedd ganddon ni oedd na wnaethon ni gytuno i dalu am wasanaeth yr heddlu yn Eisteddfod Tyddewi.

"Dydan ni ddim wedi talu gan nad oedden ni'n gwybod bod yn rhaid i ni wneud hynny.

"Rydw i wedi cysylltu gyda'r heddlu a gofyn iddyn nhw ddod yn ôl ata i."

Fe wnaeth yr heddlu godi tâl o £15,000 ar gyfer y gwasanaeth yn Eisteddfod Llanelli dair blynedd yn ôl.

Cafodd hwnnw ei dalu yn llawn.

Bydd adran gyllid a phwyllgor awdurdod Heddlu Dyfed Powys yn trafod a gwneud penderfyniad ar eu polisi ar gyfer y dyfodol.