Mae'r Gymdeithas yn casglu enwau'r cyhoedd a mudiadau ar eu datganaid
|
mae taith gerdded gan aelodau Cymdeithas yr Iaith Gymraeg o Ogledd Cymru i'r De yn parhau.
Bwriad y daith a gychwynnodd ddydd Sadwrn yn Llangefni ydy tynnu sylw at ddyfodol cymunedau Cymru.
Ddydd Gwener mae'r aelodau yn cerdded o Fachynlleth i Aberystwyth.
Yn Aberystwyth mae disgwyl i'r aelodau gynnal cyfarfod cyhoeddus, fel sydd wedi digwydd mewn nifer o drefi eraill ar hyd y daith.
Yno i'w hannerch y bydd Dr Meredydd Evans ac Arwel Rocet Jones.
Yna mae disgwyl i'r Gymdeithas gynnal gig yn Nhafarn y Cwps gyda Bob Delyn a'r Ebillion a Gilespi.
Ddydd Sadwrn fe fydd y teithwyr yn parhau ar y daith ac yn cerdded drwy Lannon i Aberaeron.
Yno i'w hannerch y bydd Emyr Llewelyn.
Mae disgwyl i'r Gymdeithas gyrraedd Caerdydd ar 30 Awst.
Ddydd Mawrth roedd nifer o Gynghorwyr Sir Gwynedd yn y cyfarfod yn ogystal â'r AS lleol, Hywel Williams.
Yn sgil hyn bwriad y Gymdeithas ydy trefnu cyfarfod pellach rhwng swyddogion y Gymdeithas ac arweinwyr y Cyngor i drafod materion a gododd yn y cyfarfod.
Huw Lewis: Angen tynnu sylw at argyfwng tai Cymru
|
Mae'r Gymdeithas yn gofyn i'r cyhoedd i arwyddo datganiad dros ddyfodol cymunedau Cymru.
Yn y datganiad mae'r Gymdeithas yn nodi egwyddorion y maen nhw'n credu y dylid fod yn sail i bolisïau tai a chynllunio'r dyfodol.
"Mae'r datganiad yma wedi cael ei ddosbarthu'n eang yn barod a'n bwriad ydy i gael mwy o bobol i'w arwyddo, a mudiadau fel cynghorau, yn ystod y daith," meddai Huw Lewis, Cadeirydd y Gymdeithas.
"Rydym wedi cael cefnogaeth gref gan bobol leol ac roedd 'na dyrfa dda ar y diwrnod cyntaf.
"Fe wnaeth streicwyr Friction Dynamics arwyddo'r datganiad a chawsom ginio gan Hywel Williams, AS Caernarfon ddydd Sul.
"Bu Dafydd Iwan hefyd yn annerch yn y gwasanaeth gafodd ei gynnal ar y Maes yn y dref.
"Ym Mhenygroes cafodd y datganiad ei arwyddo gan Alun Ffred Jones, AC a Walis George, Prif Weithredwr Tai Eryri."
Mae'r datganiad yn galw am sicrhau dyfodol gymunedau Cymraeg
|
Pan wnaeth yr aelodau gyrraedd Llanaelhaearn fe wnaeth Geraint Jones arwyddo'r datganiad.
Mr Jones oedd y person cyntaf i gael ei garcharu dros yr iaith.
"Bwriad y daith ydy tynnu sylw at yr argyfwng tai sydd yn wynebu cymunedau ar draws Cymru ac i bwysleisio'r camau hynny y dylai Llywodraeth Cymru eu cymryd er mwyn lleddfu'r sefyllfa," ychwanegodd Mr Lewis.
Mae'r aelodau yn cario blwch coch gyda nhw sy'n cynnwys anfonebau gan gynghorwyr sir ar hyd y daith sy'n nodi faint o gyllid sydd ei angen mewn gwahanol siroedd i sicrhau bod modd i bobol allu aros yn eu cymunedau a phrynu neu rent eiddo o dan y Cynllun Cymorth Prynu'r Llywodraeth.
Bwriad y Gymdeithas ydy cyflwyno'r datganiad i Lywodraeth y Cynulliad ym mis Tachwedd pan fydd y Gymdeithas yn cynnal Rali yng Nghaerdydd.
Mae disgwyl i Mr Jones, Leanne Wood AC a'r Athro Hywel Teifi Edwards annerch y rali ar 15 Tachwedd.
Home
