Mae Twm Morus yn aelod brwd o Cymuned
|
Twm Morys sydd wedi ennill Cadair Eisteddfod Genedlaethol Maldwyn a'r Gororau.
Drysau oedd testun yr awdl eleni ac fe ymgeisiodd naw yn y gystadleuaeth.
Mae'r Gadair yn rhodd gan Gangen Sir Maldwyn o Undeb Cenedlaethol yr Amaethwyr ac wedi ei chreu gan Robert Morgan o Lanbrynmair.
Yn ogystal â derbyn y Gadair mae Mr Morys yn derbyn gwobr ariannol o £750.
Beirniaid y gystadleuaeth eleni oedd Myrddin ap Dafydd, Donald Evans a Ieuan Wyn.
Roedd y tri yn gytûn bod awdl Twm Morys yn dod i'r brig am ei bod yn awdl ag iddi ddyfnder a gweledigaeth yn ogystal ag angerdd cyson.
Fe ddaw Twm Morys o Lanystumdwy ger Cricieth.
Cafodd ei eni ym 1961 ar aelwyd 'Eingl-Gymreig'.
Roedd un taid iddo yn fecanig yn Sir Fynwy a'r llall yn blanwr te yn Ceylon.
Cafodd Mr Morys ei eni yn Rhydychen gan fod ei dad yn ysgrifennu llyfr am y lle ar y pryd.
Ond pan oedd yn ddwy flwydd oed symudodd y teulu i Lanystumdwy a chychwynnodd ei addysg yn ysgol y Llan.
Ysgol breswyl
Ond pan oedd yn saith oed cafodd ei anfon i ysgol breswyl ac yna i Ysgol Fonedd Amwythig.
Gwnaeth ei arholiad Lefel A yn Ysgol Gyfun Aberhonddu, yr unig ddisgybl yn y dosbarth Cymraeg.
Aeth i Goleg Aberystwyth i wneud Astudiaethau Celtaidd gan ennill Cadair yr Eisteddfod Ryng-Golegol.
Ar ôl graddio aeth yn ymchwilydd gyda Radio Cymru am dair blynedd ac yna ennill ei damaid fel Clerwr am ryw wyth mlynedd cyn mynd i Lydaw am ddegawd ac wedyn dychwelyd i Lanystumdwy.
Mae ganddo ddau o blant sef Angharad a Gwion ac mae'n briod â Sioned Wyn.
Mae'n aelod brwd o Cymuned ac yn canu efo band Bob Delyn a'r Ebillion.
Home
