Mae Glyn Williams, Cadeirydd y Pwyllgor Cyllid, yn bles iawn â gwaith y pwyllgorau lleol
|
Fe ddywedodd Glyn Williams, Is-gadeirydd y Pwyllgor Gwaith a Chadeirydd y Pwyllgor Cyllid, ddydd Iau ei fod yn bles iawn â'r cyfanswm o arian y llwyddodd y gronfa leol ei godi ar gyfer yr Eisteddfod.
Llwyddodd y gronfa leol i godi £241,000 ar gyfer yr Eisteddfod ac roedd hyn yn llawer uwch nac yr oedd y Pwyllgor Gwaith wedi ei ragweld.
"Pan osodwyd targed o £201,000 i'r gronfa leol roeddwn i'n meddwl y byddem ni'n cael trafferth.
"Ond mae haelioni pobol Maldwyn a'r Gororau wedi sicrhau fod y gronfa wedi codi £241,000.
"Dwi'n gobeithio y bydd hyn yn symbyliad i Eisteddfod Casnewydd ac eisteddfodau'r dyfodol.
"Mae'r bobol leol wedi bod yn cyd-weithio'n dda ac roedd yn fraint arwain y tîm.
'Gweithgar'
"Mae pobol wedi bod yn weithgar iawn a chanlyniad hyn yw ein bod ni wedi cyrraedd a phasio'r targed," meddai.
Cafodd 47 o bwyllgorau apêl eu sefydlu gyda nifer ohonyn nhw dros y ffin yn Lloegr mewn ardaloedd fel Croesoswallt, Birmingham, Wolverhamton a Stoke on Trent.
Meddai Mr Williams am y pwyllgorau hynny: "Fe lwyddon nhw i godi swm sylweddol ac mae eu gweithgaredd a'u brwdfrydedd wedi bod yn esiampl i rai ardaloedd yng Nghymru."
Mae trefnwyr yr Wyl yn hapus iawn â'r niferoedd sydd wedi dod i ymweld â'r Brifwyl hyd yn hyn ac maen nhw'n falch fod dros 750 o garafannau bellach wedi cyrraedd y Maes.
Hefyd maen nhw'n bles â'r niferoedd ym Maes B.
Meddai Hywel Wyn Edwards, Trefnydd yr Eisteddfod yn y Gogledd: "Mae Maes B yn llawn ac mae llawer o bebyll wedi cyrraedd.
"Rydyn ni'n gobeithio y bydd hyd yn oed mwy yn cyrraedd o heno (nos Iau) ymlaen."
Home
