Parti masnach deg ar y Maes

Rhodri Glyn Thomas yn profi'r coffi gydag Alan Price, sydd yn gwerthu'r peiriannau coffi

Cafodd parti masnach deg ei gynnal ar Faes yr Eisteddfod ddydd Iau.

Ymhlith y gwesteion y tu allan i'r Babell Heddwch roedd Rhodri Glyn Thomas AC, Betty Williams AS, Ffred Ffransis a Gillian Elisa.

Roedd y gwesteion yn blasu tê a choffi sy'n sicrhau pris teg i ffermwyr a chynhyrchwyr yng ngwledydd tlawd y byd.

Hefyd roedd cyfle iddyn nhw weld peiriant coffi sydd yn darparu coffi teg yn gweithio.

Gwerin y Coed, Oxfam, Cymorth Cristnogol a'r Ganolfan Gymraeg ar Faterion Rhyngwladol oedd yn gyfrifol am y digwyddiad.

Rydyn ni wedi bod yn trafod masnach deg yn y Cynulliad a chael peiriant coffi teg yno a gobeithio y bydd sefydliadau eraill yn gwneud yr un fath. Rhodri Glyn Thomas, A.C

Wrth egluro pam y penderfynodd ddod i brofi'r coffi, meddai Rhodri Glyn Thomas: "Mae'n bwysig cefnogi masnach deg yn y byd gan fod masnach yn golygu fod pobol cael eu gorfodi i fyw mewn tlodi ac yn cael eu hecsploetio.

"Rydyn ni wedi bod yn trafod masnach deg yn y Cynulliad a chael peiriant coffi teg yno a gobeithio y bydd sefydliadau eraill yn gwneud yr un fath.

"Rydyn ni yn y Cynulliad wedi manteisio ar y cyfle i sôn am y sefyllfa ryngwladol a'r cyfrifoldeb dros dynged pawb yn y byd a bod yn rhaid cyd-fyw," ychwanegodd.

'Parchu'

Mae Ffred Ffransis, perchennog Cadwyn, yn ymwybodol hefyd o bwysigrwydd masnach deg ac mae ei gwmni crefftau yn cyd weithio gyda chrefftwyr yng Ngogledd a Gorllewin Affrica.

Mae Cadwyn yn gwerthu nwyddau'r crefftwyr hyn.

Gillian Elisa a'i chariad yn mwynhau'r coffi yn yr haul

Meddai Mr Ffransis: "Rydyn ni'n parchu'r crefftwyr sy'n cynhyrchu'r nwyddau fel pobol ac fel cyfeillion ac os yw rhywun yn adnabod pobol yna fyddan nhw ddim yn cael eu hecsploetio."

Wrth sôn am y peiriant coffi meddai: "Mae nifer o bobol yn cytuno â masnach deg ond prosiectau fel hyn sydd ei angen i droi'r syniad yn gynllun."

Un arall oedd yn mwynhau'r coffi oedd Gillian Elisa.

Cefnogi

"Mae cefnogi masnach deg yn bwysig oherwydd mae angen i'r bobol sy'n gwneud y gwaith gael y tâl cywir.

Mae nifer o bobol yn cytuno â masnach deg ond prosiectau fel hyn sydd ei angen i droi'r syniad yn gynllun. Ffred Ffransis, perchennog Cadwyn

"Rydw i'n falch fod y digwyddiad yma wedi ei drefnu i dynnu sylw er mwyn i bobol ddeall beth sy'n mynd ymlaen," meddai.

Awel Irene Swyddog Datblygu Cynaladwy Gwerin y Coed, mudiad dros heddwch i blant a phobol ifanc, oedd wedi trefnu'r digwyddiad ddydd Iau.

Yn ogystal â chodi ymwybyddiaeth y cyhoedd ynglýn â masnach deg dywedodd ei bod yn gobeithio y bydd y digwyddiad yn perswadio'r Eisteddfod i ddefnyddio'r peiriannau.

Meddai: "Rydyn ni'n gofyn i'r Eisteddfod wrth roi cytundebau bwyd y flwyddyn nesaf i gynnwys cymal sy'n rhoi'r opsiwn i bawb i ofyn am de a choffi masnach deg."

BBC Cymru'r Byd yn yr Eisteddfod