Mae gan yr Eisteddfod bafiliwn newydd
|
Mae disgwyl i filoedd o bobl heidio i Feifod yn Mhowys ddydd Sadwrn ar gyfer diwrnod cynta'r cystadlu yn Eisteddfod Genedlaethol Maldwyn a'r Gororau.
Cafodd y Brifwyl ei hagor yn swyddogol nos Wener.
Mae'r trefnwyr yn hyderus y bydd y tyrfaoedd yn heidio i Feifod.
Dywedodd y cyfarwyddwr, Elfed Roberts, mai dyma "un o safleoedd gorau'r Eisteddfod erioed".
"Mae'r rhagolygon yn dda iawn o ran y tywydd ac mae'r traffig yn dod yn ddi-broblem," meddai Hywel Wyn Edwards, Trefnydd y Gogledd.
Mae dros 400 o garafanau eisoes wedi cyrraedd y Maes Carafanau ac roedd dros 600 wedi gwneud cais am le.
Bydd elfennau newydd yn aros Eisteddfotwyr wedi iddyn nhw gyrraedd y Maes ym Meifod.
Mae'r Pafiliwn yn newydd ac mae'r trefnwyr wedi eu plesio gan ei fod yn ateb y gofynion priodol a'r rheolau tân.
Pafiliwn yw hwn wedi ei logi o'r Iseldiroedd a dyma'r tro cyntaf iddo gael ei godi ym Mhrydain.
Mae bron i 3,500 o seddau ynddo ac mae lle i ehangu eto.
Dywedodd Mr Roberts fod "nifer o bethau'n bosib yn y Pafiliwn" ac efallai y bydda'r Eisteddfod yn ystyried gosod stiwdio yno yn y dyfodol.
Croesawgar
Mae Theatr y Maes wedi cael pabell newydd a gobaith y trefnwyr yw y bydd y theatr newydd yn fwy croesawgar.
Datblygiad arall eleni yw defnyddio logo'r Eisteddfod yn lle logo lleol.
Y rheswm am hynny, meddai'r trefnwyr, oedd bod y logo lleol yn aml yn creu dryswch.
"Roedd Steddfod 1937 yn Eisteddfod arloesol gyda'r Cyngor yn cyfarfod ar ei ffurf newydd am y tro cyntaf, a dawns y blodau yn cael ei chynnal am y tro cyntaf," meddai R Alun Evans, Llywydd Llys yr Eisteddfod.
"Dwi'n gweld hon hefyd yn Steddfod arloesol ac mae'r Steddfod yn gwneud ymdrechion i fod yn fwy cyfeillgar.
"Mae hwn yn faes a fydd yn creu bwrlwm a diddordeb.
"Gobeithio y bydd miloedd yn dod yma, yn enwedig oherwydd y tywydd braf ganol yr wythnos," meddai.
Home
Dwi'n gweld hon hefyd yn Steddfod arloesol ac mae'r Steddfod yn gwneud ymdrechion i fod yn fwy cyfeillgar.
