Awyren o'r Fali mewn damwain

Glaniodd y peilot ger yr A170

Mae awyren Hawk o'r Fali wedi disgyn i'r ddaear yng Ngogledd Sir Efrog.

Dywedodd y Weinyddiaeth Amddiffyn fod yr awyren wedi dod i lawr ar hen drac rheilffordd yn Dawson Wood ger yr A170 rhwng Pickering a Sinnington.

Cadarnhawyd bod y peilot wedi gallu gadael yr awyren tra yn yr awyr ac aed ag o gyda hofrennydd i ysbyty yn Scarborough.

Dywedodd llefarydd na chafodd neb arall niwed.

Dywedodd un welodd y ddamwain: "Roedd yna glec anferth ac mi welson ni barasiwt yn yr awyr.

"Daeth yr ambiwlans awyr i'r cae ble daeth y parasiwt i lawr."

Caewyd yr A170 tra bod ymchwiliad yn cael ei gynnal i'r ddamwain.