Cymuned 'i helpu mewnfudwyr'

Trafodir sefydlu cymdeithasau tai yn y gynhadledd

Bydd mudiad Cymuned yn cynnal ei chynhadledd flynyddol yn Harlech ddydd Sadwrn, ac un o'r cynigion fydd helpu mewnfudwyr i ymdoddi i'r gymuned.

Ymhlith y cynigion a drafodir bydd:

Cynnig i awdurdodau lleol gynnig grantiau adleoli i frodorion sydd wedi symud o'r ardal fel y gall pobl gael eu cynorthwyo i ddychwelyd i fro eu mebyd

Cynnig i gynnal gweithdai i hyfforddi aelodau Cymuned i sefydlu cymdeithasau tai cydweithredol bychain

Cynnig i aelodau fabwysiadu mewnfudwr yr un er mwyn eu helpu i ymdoddi i'r gymuned.

Mae yna, hefyd, gynigion ynglýn â chyflogaeth, côd Cymuned ar gyfer arwerthwyr tai, amddiffyn sefydliadau uniaith Gymraeg, ystyried dewisiadau gwleidyddol y mudiad, hen ganiatadau cynllunio, Cynllun Datblygu Unedol Ceredigion ac Addysg Gymraeg ym Mhrifysgol Cymru.

"O edrych ar y cynigion yn eu cyfanrwydd byddwn i'n dweud mai'r brif thema yw ein gwaith cymunedol," meddai Simon Brooks ar ran y mudiad.

'Ffres a newydd'

"Yn bendant, mae rhai o'r syniadau yma - megis mabwysiadu mewnfudwyr a grantiau adleoli i bobol sydd wedi symud i ffwrdd, efallai i Gaerdydd neu Loegr, i ddychwelyd i fro eu mebyd - yn rhai ffres a newydd.

"Dangosodd canlyniadau iaith Cyfrifiad 2001 a ryddhawyd yr wythnos yma fod gostyngiad arall wedi bod yn nifer a chryfder ein cymunedau Cymraeg.

"Ond ni fydd Cymuned yn digalonni nag yn chwifio'r faner wen.

"Yn wir, ni fu amser gwell i ni ddod at ein gilydd er mwyn cadw a datblygu hynny o gymunedau Cymraeg sydd ar ôl."