Daw'r cyhoeddiad am ddyfodol y cwmni Cymreig yn sgil cytundeb rhwng Laura Ashley a chwmni rhyngrwyd Blueberry.net Ltd.
Bydd gwasanaeth arlein y cwmni yn cychwyn yn yr Hydref.
Dywedodd Prif Weithredwr y grwp, Kwan Cheong Ng: "Rydym yn hapus iawn gyda'r perfformiad diweddar."
Mae'r cwmni wedi cyhoeddi busnes archebu drwy'r post sydd yn llwyddiannus a bydd hyn yn ehangu i fod yn gyfrifol am yr archebion arlein.
Cadw ffatrïoedd Cymru
Ar yr un pryd, mae'r cwmni wedi penderfynu cadw eu ffatrïoedd sy'n cynhyrchu nwyddau i'r cartref yn y Drenewydd a Charno.
Mae gwerthiant cynnyrch nwyddau i'r cartref wedi cynyddu dros y misoedd diwetha'.
Wrth i'r canolbarth dderbyn newyddion da mae gwaith 300 o bobol yn saff.
Mae gwerth cyfranddaliadau cwmni Laura Ashley wedi codi ar ôl iddyn nhw gyhoeddi y byddan nhw'n dechrau gwerthu eu nwyddau ar y we.
Mae'r cwmni wedi wynebu nifer fawr o broblemau ariannol yn ystod y blynyddoedd diwethaf sydd wedi dod ag ansicrwydd i ardal wledig canolbarth Cymru.
Cychwynnodd y cwmni yn un llwyddiannus iawn yn y 70au ond erbyn y 90au roedd y cynlluniau blodeuog nodweddiadol o'r cwmni allan o ffaswin ac fe gafwyd cryn broblemau ariannol.
Mae'r cwmni wedi cau pum ffatri yng Nghymru ac un yn yr Iseldiroedd.
|
|