Gwahardd pêl-droediwr 15 oed am oes

Mae'r dyfarnwr wedi rhoi bai ar sêr pêl-droed am roi esiampl wael

Mae bachgen 15 oed wedi cael ei wahardd rhag chwarae pêl-droed am oes oherwydd iddo daro dyfarnwr yn ei wyneb.

Mae hyn yn golygu na chaiff Nick Taylor o Aberaeron chwarae i'r un tîm yn y byd byth eto.

Yn ôl y dyfarnwr Terry Lowrie, mae'r bai i gyd ar sêr Cynghrair Lloegr am osod enghraifft wael i bobol ifanc.

Mi fu i Nick, oedd yn chwarae yn y gôl, daro Mr Lowrie'n ei wyneb ddwywaith ar ddiwedd gêm i rai dan 15 rhwng Aberaeon a Chastell Newydd Emlyn.

Dadlau

Rhedodd y bachgen ysgol 6 troedfedd i ganol y cae a dadlau ag o ynglýn â sut yr oedd wedi dyfarnu'r gêm.

Mi darodd o'r tro cyntaf ar ei foch a'r ail dro yn ei geg.

Mi ddylai Roy Keane osod esiampl dda

Bu raid i Mr Lowrie fynd i'r ysbyty i gael triniaeth.

Credir mai Nick ydy'r ieuengaf i gael ei wahardd am oes yng Nghymru.

Roedd tîm Nick wedi colli 5-2 a thri o chwaraewyr wedi eu hel oddi ar y cae gan Mr Lowrie.

"Mi ddylai chwaraewyr fel Roy Keane osod esiampl i chwaraewyr ifanc yn hytrach na chael ei yrru o'r cae," meddai Mr Lowrie.

'Afresymol'

Yn ôl llys-dad Nick, John Evans, roedd hi'n "hollol wirion" ei fod wedi'i wahardd am oes.

"Ddylai o fod ddim wedi taro'r dyfarnwr ond roedd y gosb yn afresymol," meddai.

Yn ôl Malcolm Eaton o FA Canolbarth Cymru: "Rwyf wedi fy nychryn gan y cynnydd mewn trais.

"Wnaeth y chwaraewr dan sylw ddim trafferthu i ddod i'r cyfarfod disgyblu a dydy o ddim wedi ymddiheuro.

"Mae'n rhaid cael gwared â'r trais."

Mae Nick wedi rhoi'r gorau i chwarae pêl-droed rwan ac wedi ymddiddori yn Tai-Kwando sy'n debyg i jiwdo.

Mae o yn nhîm iau Cymru.