Mae Cymru ar ei hôl hi yn chwyldro'r we, yn ôl ffigurau swyddogol newydd.

Dengys ffigurau diweddara' yr ONS, Swyddfa Ystadegau Prydain, fod cartrefi 25% o bobol gwledydd Prydain ar y we.

Ond tra bod 25% o bobol Llundain ar y we, y ffigur yng Nghymru yw 15%.

Roedd ffigurau Cymru'n well na rhai Gogledd Iwerddon, 11%, yr Alban, 14%, a Gogledd-Ddwyrain Lloegr, 14%, ond yn waeth na Gogledd-Orllewin Lloegr, 18%, East Anglia, 22%, De-Ddwyrain Lloegr, 24%, a Llundain, 25%.

Dyblu

Serch hynny, yn y rhan fwya' o ranbarthau a gwledydd, mae defnyddio'r we wedi dyblu ers y llynedd.

Dengys yr ONS fod teuluoedd sy'n cynnwys plant yn fwy tebyg o fynd ar y we.

Yn ystod tri mis cynta' 2000 roedd tua 6.5m o deuluoedd ar y we.

Cyrraedd

"Mae nifer o gynlluniau ar y gweill i sicrhau fod y we'n cyrraedd mwy o bobol," meddai llefarydd Swyddfa'r Cabinet.

Erbyn y flwyddyn nesa', bydd 700 canolfan Technoleg Gwybodaeth yn cael eu hagor, meddai.

A bydd y llywodraeth yn anelu at werthu neu osod ar brydles 100,000 o gyfrifiaduron sy' wedi eu hatgyweirio.

Erbyn 2002 bydd pob ysgol a llyfrgell yng ngwledydd Prydain ar y we, meddai.