Mae'r cyn chwaraewr rygbi rhyngwladol Mark Ring yn cyfadde' iddo gael cynnig £30,000 i ddylanwadu ar ganlyniad gêm Pencampwriaeth Pum Gwlad ddeng mlynedd yn ôl.

Dywedodd Ring fod ffrind wedi cysylltu â fe cyn y gêm rhwng Cymru a'r Iwerddon yn Landsdowne Road, Dulyn, gan ofyn iddo ddylanwadu ar ganlyniad y gêm.

Dywedodd Ring wrth y BBC na dderbyniodd e'r arian ac na fyddai fyth yn betio ar gêm yr oedd yn chwarae ynddi.

Yn y cyfamser, mae Undeb Rygbi Cymru'n ystyried gwahardd chwaraewyr sy'n betio ar gêmau wedi i chwaraewr rhyngwladol gyfadde' iddo osod bet yn erbyn Cymru.

Roedd Neil Boobyer, sy'n chwarae i Lanelli, wedi betio arian ar Gymru i golli yn erbyn Ffrainc yn ystod Pencampwriaeth y Chwe Gwlad.

Bu'n chwarae i Dîm A Cymru noson cyn y gêm ac yn hyfforddi gyda'r tîm cynta'.

Roedd e wedi cael ar ddeall nad oedd dim o'i le yn hynny.

Wnaeth e hefyd roi arian ar Loegr i guro Cymru, gêm nad oedd ganddo ddim byd i'w wneud â hi.

Torri rheolau?

Mae Boobyer wedi ennill saith cap i Gymru ac roedd yn aelod o'r garfan yn ystod Cwpan y Byd y llynedd.

Ond nawr mae e wedi cyfaddef ei fod e ac eraill yn gamblo cannoedd o bunnau ar gêmau.

Mae chwaraewyr eraill hefyd yn rhoi arian ar gêmau rygbi, meddai, a dydyn nhw chwaith ddim yn credu eu bod yn gwneud dim o'i le.

Dim betio

Yn Awstralia a Seland Newydd dyw chwaraewyr ddim yn cael betio ar gêmau rygbi.

A dyw chwaraewyr pêl-droed Prydain chwaith ddim yn cael betio arian ar gêmau pêl-droed.

Dywedodd Damien Hopley o'r Gymdeithas Chwaraewyr Rygbi Proffesiynol eu bod nhw wrthi'n llunio cytundebau ar hyn o bryd fydd yn gwahardd betio ar gêmau.