Ymosodiadau parhaus ar Baghdad

Y prif darged oedd unedau'r Gwarchodlu Gweriniaethol ac adeiladau'r llywodraeth

Mae mwy o ffrwydradau wedi ysgwyd dinas Baghdad ddydd Sul wedi un o'r cyrchoedd awyr mwyaf dwys ers dechrau'r rhyfel.

Dywed gohebwyr fod y cyrchoedd yn digwydd ddydd a nos erbyn hyn, gan fynd yn fwy dwys bob tro.

Clywyd ffrwydradau enfawr ar gyrion Baghdad M 1600 amser lleol (1300 GMT) ddydd Sul wrth i America geisio targedu'r Gwarchodlu Gweriniaethol ac adeiladau'r llywodraeth.

Mae ffrwydradau enfawr wedi ysgwyd y brifddinas yn barhaus er nos Sadwrn.

Fe glywyd dros ddwsin o ffrwydradau i'r de ac i'r dwyrain o Baghdad ddydd Sul, yn ôl asiantaeth newyddion Reuters.

Ysgwyd

Roedd yr adeiladau yn ysgwyd yn barhaus a phelen dân oren yn goleuo'r awyr.

Dywedodd swyddogion milwrol America eu bod wedi gollwng ffrwydron ar brif wersyll milwrol y parafilwyr sydd yn deyrngar i Saddam Hussein ac ar balas y credir ei fod yn eiddo i fab yr arlywydd, sef Qusay.

Fe fyddwn ni'm defnyddio unrhyw gyfrwng i ladd ein gelyn yn ein tir ac fe fyddwn ni'n dilyn y gelyn i'w dir yntau."

Taha Yassin Ramadan, Dirprwy Arlywydd Irac

Yn y cyfamser mae Irac wedi rhybuddio y bydd mwy o ymosodiadau terfysgol yn erbyn lluoedd y glymblaid.

Fe fu'r ymosodiad cyntaf ddydd Sadwrn wedi i filwr, oedd yn ymddangos fel gyrrwr tacsi, danio ffrwydrad yn ei gerbyd gan ei ladd ei hun a phedwar milwr Americanaidd, ar gyrion tref Najaf.

Dywedodd un o ohebyddion y BBC sydd yn Baghdad fod dwy ymgyrch awyr yn digwydd ddydd Sul.

Mae awyrennau'r B52 yn gollwng llu o ffrwydron ar safleoedd y Gwarchodlu Gweriniaethol ar gyrion Baghdad ac wedyn mae cyrch awyr dros y ddinas ei hun gyda thaflegrau a ffrwydron yn cael eu defnyddio.

Mewn datblygiad arall dywedodd llywodraeth Prydain fod pennaeth amddiffynfeydd awyr Baghdad wedi ei ddiswyddo gan fod taflegrau Irac wedi bod yn disgyn ar y brif ddinas.

Ymchwilio

Yn ôl rhai arbenigwyr fe allai hyn fod yn un eglurhad posib dros y ffrwydradau ym marchnadoedd Baghdad ddydd Mercher a dydd Gwener pan fu dwsinau o bobol farw.

Ond nid yw Irac wedi cadarnhau'r adroddiad.

Yn y cyfamser mae lluoedd y glymblaid yn parhau i ymchwilio i geisio darganfod ai eu taflegrau nhw oedd yn gyfrifol.

Mae swyddogion milwrol America wedi dweud na fyddan nhw'n newid eu cynlluniau o ganlyniad i'r ymosodiad terfysgol ddydd Sadwrn.

Meddai'r Cadfridog Richard Myers "Rydw i'n credu y gallwn ni addasu'n tactegau i wrthsefyll y bygythiad o ymosodiadau terfysgol."

Dywedodd y byddai lluoedd y glymblaid yn dymchwel Saddam Hussein yn y diwedd, ond rhybuddiodd fod y brwydro anodd "o'n blaenau o hyd".

Wedi'r ymosodiad ddydd Sadwrn meddai dirprwy arlywydd Irac, Taha Yassin Ramadan, "Dim ond y dechrau yw hyn.

"Dyma fydd ein polisi milwrol. Fe fyddwn ni'm defnyddio unrhyw gyfrwng i ladd ein gelyn yn ein tir ac fe fyddwn ni'n dilyn y gelyn i'w dir yntau."

Mewn datblygiadau eraill:

Dywedodd lluoedd Prydeinig eu bod nhw wedi dal pum swyddog Iracaidd ac wedi lladd un cyrnol gyda'r Gwarchodlu Gweriniaethol mewn cyrch ar bentref i'r de o Basra.

Dywedodd peilotiaid Prydain eu bod nhw wedi dinistrio safle oedd yn cael ei ddefnyddio i ddarparu tanwydd i danciau'r Gwarchodlu Gweriniaethol ger Karbala.

Mae mwy o gyrchoedd awyr wedi bod ar Basra a Mosul yn ôl gorsaf deledu al-Jazeera.

Mae swyddogion milwrol America yn y Ganolfan Reolaeth America yn Qatar wedi datgan fod dau filwr arall wedi eu lladd mewn damweiniau yn ne Irac.