Prinder ieithoedd tramor yng Nghymru

Mae angen dysgu plant yn ifanc i siarad ieithoedd tramor

Caiff plant ysgol yng Nghymru eu hannog i ddysgu iaith dramor, wedi i nifer o ysgolion weld gostyngiad yn nifer y disgyblion sy'n dilyn y cyrsiau.

Yng Nghymru dim ond 37% o blant sy'n dilyn cwrs iaith dramor hyd lefel TGAU tra bod 95% yn dilyn cwrs yn Lloegr.

Huw Edwards: Hybu dysgu iaith

Yn ôl ystadegau a gafodd ei rhyddhau ddydd Iau mae 19% o gwmnïau'n colli busnes yng Nghymru oherwydd eu bod yn brin o sgiliau iaith neu sgiliau diwylliannol.

Mae 42% yn wynebu rhwystrau ieithyddol a diwylliannol wrth fasnachu dramor a dim ond 8.6% sydd â strategaeth ar gyfer ymdrin â materion ieithyddol.

Dyma brif ganfyddiadau'r archwiliad a gwblhawyd yn ddiweddar gan y Corff Hyfforddi Cenedlaethol ar ran Llywodraeth Cynulliad Cymru.

Mesur y bwlch

Holwyd dros 5,000 o gwmnïau i ganfod eu hanghenion ieithyddol a diwylliannol, ac ymgynghorwyd yn fanwl gydag amrywiaeth eang o fudiadau i fesur gallu'r wlad i gwrdd â'r gofynion hynny.

Mae'r archwiliad yn galluogi Llywodraeth y Cynulliad i ganfod a mesur y bwlch sgiliau ac i edrych eto ar beth sydd ei angen ar gwmnïau a'r hyn maent yn ei ddisgwyl gan ddarparwyr addysg, hyfforddiant a gwasanaethau yn ystod y blynyddoedd nesaf.

Mae busnes angen ieithoedd tramor i fasnachu yn Ewrop

Mae'r ymgyrch i ddenu bobol i ddysgu iaith dramor yn derbyn cefnogaeth gan Huw Edwards, cyflwynydd Newyddion 10 y BBC, sydd wedi graddio gyda gradd dosbarth cyntaf mewn Ffrangeg.

Fe fydd Mr Edwards, a gafodd ei fagu yn ardal Llanelli, yn ymddangos mewn ffilm fydd yn cael ei lansio ddydd Iau i hybu disgyblion i ddysgu iaith a bod 'na gyfleoedd gwych ar gael gyda ieithoedd.

Caiff y fidio ei lansio yn Ysgol Maes-yr-Yrfa, Llanelli ac fe fydd y newyddiadurwr Ben Thomas a'r gyflwynwraig Heledd Cynwal yno i ateb cwestiynau gan ddisgyblion.

Mae'r ymchwiliad yn rhoi darlun llawn iawn o'r ddarpariaeth iaith sydd eisoes yn bodoli mewn ysgolion, prifysgolion a cholegau Cymru, a beth yw natur a chwmpas gwasanaethau masnachol mewn ieithoedd.

Mae'r ystadegau a gasglwyd yn sylfaen y gall Llywodraeth y Cynulliad eu defnyddio i gynllunio ar gyfer y dyfodol, gyda phartneriaid allweddol.

Agenda

Mae'r Corff Hyfforddi wedi cynnig agenda pum pwynt sy'n cynnwys:

gwella gwybodaeth o'r farchnad a chreu agwedd genedlaethol; hyrwyddo rhwydweithio a sefydlu cymorth ymarferol.

Dywedodd Andrew Davies AC, Y Gweinidog dros Ddatblygu Economaidd: "Corff sy'n canolbwyntio ar fusnesau yw Rhwydwaith Ieithoedd Cymru a'i nod yw helpu cwmnïau i siarad iaith eu cwsmeriaid.

"Rwy'n croesawu sefydlu'r rhwydwaith hwn. Mae Llywodraeth Cynulliad Cymru wedi ymrwymo i helpu cwmnïau Cymru i wneud mwy o fusnes rhyngwladol.

"Bydd gwaith Rhwydwaith Ieithoedd Cymru'n help i gefnogi'r amcan hwnnw."