Ydy Môn yn ynys?

Y Fenai yn gwahanu Môn oddi wrth y tir mawr

Mae'r honiad fod statws Ynys Môn fel ynys o dan fygythiad o ganlyniad i benderfyniad y Comisiwn Ewropeaidd yn "nonsens, " medd swyddog o'r Comisiwn.

Mae llefarydd ar ran swyddfa'r Comisiwn yng Nghaerdydd wedi gwadu'r honiadau fod system i ddiffinio ynysoedd ar y gweill fyddai'n golygu na fyddai Ynys Môn na rhai o ynysoedd yn yr Alban yn cael eu galw'n ynysoedd.

Dywedodd fod dyfyniad wedi ei dynnu o'i gyd-destun.

Mae'r Comisiwn Ewropeaidd wedi amlinellu'r meini prawf newydd a fydd yn diffinio ynys.

Roedd honiadau eu bod yn meddwl nad oedd ynys ddim yn ynys os oedd hi lai na milltir o'r tir mawr ac os oedd pont yn cysylltu'r ddau.

'Nonsens'

Nonsens llwyr ydy hyn, meddai arweinydd Cyngor Ynys Môn, Goronwy Parry.

"Mae 'na wallgofrwydd llwyr yn Ewrop os ydyn nhw'n dod â'r diffiniad newydd i mewn.

"Rydan ni wedi cael ein cydnabod fel ynys ers canrifoedd.

"Dwi'n methu dallt eu bod nhw'n mynd ar ôl pethau bach fel yma yn lle trafod pethau llawer mwy pwysig."

Ond be ydy barn rhai o 'Wyr mawr Môn'?

Dwi ddim isio ymarweddu fel y Sun neu'r Mail pan fyddan nhw'n arwain ymgyrchoedd i achub y selsig Brydeinig yn erbyn Ewrocratiaid Brwsel. Ond wir rwan, mae dweud nad ydy Môn ddim yn ynys yn gwbl gwbl hurt. Mae hi ac wrth gwrs ei bod hi. Dyna ydy ei gogoniant hi a dyna ydy ei gwendid hi hefyd. Pan fo byw ar ynys yn gwneud pobol yn ynysig,
Vaughan Hughes, Cyfarwyddwr Teledu.

Fe ddylen nhw gadw eu syniadau iddyn nhw eu hunain. Mae hi wedi bod yn ynys erioed ac mae synwyr cyffredin yn dweud os oes 'na ddwr rhwng y ddau dir, all hi ddim bod yn ddim ond ynys. Digon hawdd dweud bod y bont yn gwneud gwhaniaeth yna allwch chi eu tynnu i lawr a gwneud i bawb ddysgu nofio.
Aloma o Tony ac Aloma

A beth oedd gan un o feirdd y sir i'w ddweud?

Pwy goblyn a feddyliodd,
Nad ynys ydy Môn?
A phwy o grancod Ewrop
Na chredant yn ôl y sôn.
Tynnwch hen bont Britania
A hefyd y bont grog
A chadwch John Bull o 'ma
A wedyn fe ddaw'r Gog
Sy'n cadw draw o'n hynys
Oherwydd medden nhw
Fod Blair a'i griw yn honni
Mai nhw yw'r gwir gwcw.
Machraeth

Ac o gofio geiriau un arall o feirdd mawr Môn, Goronwy Owen, Pwy rydd i lawr wyr mawr Môn?