Ffôn: Rhifau newydd i wasanaeth ymholiadau

Fe fydd cystadleuaeth yn golygu pris llai i'r cwsmer

O ddydd Mawrth ymlaen mae tua 10 o gwmnïau newydd yn cynnig gwasanaeth rhifau ffôn i gystadlu ag ymholiadau 192.

Fe fydd rhaid deialu chwe rhif yn hytrach na thri o hyn ymlaen.

Fe fydd y tri rhif cyntaf yr un fath, 118, i bob cwmni ond fe fydd y tri rhif arall yn amrywio.

Gwasanaeth Newydd

Hyd at 10 cwmni yn darparu gwasanaeth

Pob rhif yn cychwyn efo 118

Gwasanaeth 192 i'w ddiddymu maes o law

Mi allai'r gystadleuaeth arwain at fwy o wasanaethau.

Dim yn unig rhifau ffôn, ond rhifau loteri, ac amserau sinema.

I weithwyr yng Nghaerdydd fodd bynnag mae'r gwasanaeth newydd yn golygu gwaith wrth i gwmni Americanaidd sefydlu eu gwasanaeth yno.

Mae'r ffaith bod y farchnad ar gyfer delio gyda ymholiadau yn agor yn nodi diwedd i wasanaeth BT 192.

Oftel, y corff sydd yn arolygu'r gwasanaeth telegyfathrebu, sydd wedi penderfynu diddymu'r monopoli sydd gan BT a gosod mwy o ddewis i'r cwsmer.

Ymhlith y cwmnïau sydd yn darparu'r gwasanaeth newydd y mae BT, Nwy Prydain, One Tel ac Orange.

Fe fydd cwmni The Number, sy'n gwmni Americanaidd, yn cyflogi 180 yng Nghaerdydd ac o bosib yn gallu cynyddu i 700 yn eu pencadlys ar gyrion y ddinas.

Credir mai dyma fydd y prif wasanaeth gan iddyn nhw gael y rhof mwya cofiadwy 118 118.

Mae disgwyl i fwy o gwmnïau gael eu lansio ddechrau'r flwyddyn.

Rhatach

Cafodd cwsmeriaid addewid y bydd galwadau yn rhatach ac y bydd nwy o wasanaeth ar gael.

"Am y tro cyntaf fe fydd gan y cwsmer ddewis o wasanaeth ymholiadau ar bris fydd yn amrywio fel y gwasanaeth," meddai David Edmonds, Cyfarwyddwr Cyffredinol Telecomunications.

Rhifau newydd

BT: 118 500

Nwy Prydain: 118 511 a 118 411

Orange: 118 000

One Tel: 118 111 a 118 211

Opal Telecom:118 114

Telegate: 118 866

The Number UK Ltd: 118 118

"Os ydach chi dim ond eisiau rhif ffôn neu eisiau gwybod rhif y sinema lleol a'r hyn sydd ar gael yno neu i gadw bwrdd mewn bwyty lleol, fe fydd yna wasanaeth ar gael ar eich cyfer.

"Fe fydd 'na gystadleuaeth hefyd o ran pris yr alwad ffôn, gyda dewis i dalu bob munud, neu un taliad, neu'r ddau."

Amcangyfrifir bod y gwasanaeth 192 yn derbyn 600 miliwn o alwadau bob blwyddyn.

Fe fydd y gwasanaeth fel ag y mae ar hyn o bryd yn dod i ben ym mis Awst 2003.

Yn ei le fe fydd BT yn darparu gwasanaeth newydd a fydd yn cynnwys elfennau o'r gwasanaeth Scoot, y maen nhw wedi ei etifeddu'n ddiweddar.

Gwell gwasanaeth

Dywed BT y bydd eu gwasanaeth newydd yn well oherwydd y bydd y cwsmer o hyd yn cael gwasanaeth llawn ac yn cael person y pen arall i'r ffôn yn hytrach na chyfrifiadur.

Fe fydd y gwasanaeth newydd ganddyn nhw yn darparu gwasanaeth be sydd ymlaen yn y sinema a amserlen teledu.

Dywed y cwmni eu bod yn croesawu cystadleuaeth gan ychwanegu y byddan nhw'n disgwyl bod yn brif ddarparwyr y gwasanaeth yn y farchnad.

Mae'r cwmni hefyd yn edrych ar y posibilrwydd i greu rhestr sydd wir ei angen o rifau ffôn symudol.

Mae BT yn bwriadu diddymu'r tâl sefydlog o 40c am y gwasanaeth ac yn bwriadu codi pris y funud am y ddarpariaeth er nad oes disgwyl i'r alwad gostio mwy 'na 40c.

Yn fuan yn y flwyddyn newydd fe fydd llyfr ffôn newydd, gyda adran ar gyfer mân hysbysebion am y tro cyntaf, yn cael eu dosbarthu i dair ardal beilot Efrog, Southampton a Southpot.