Cwest i farwolaeth Jenna Baldwin

Fe ddiflannodd Jenna ym mis Medi o'i chartref yn Abersychan

Agorwyd cwest i farwolaeth y ferch ysgol Jenna Baldwin.

Cafodd ei chorff ei ddarganfod ar ffordd fynyddig ger ei chartref yn Sir Fynwy 10 wythnos wedi iddi fynd ar goll.

Cynhaliwyd y cwest yn Llys y Crwner yng Nghanolfan Ddinesig Casnewydd.

Bydd angladd Jenna yn cael ei gynnal ddydd Llun.

Wedi ei gyhuddo: Llys-tad Jenna, Mike Baldwin

Diflannodd Jenna, 15, ar 10 Medi o'i chartref ym mhentref Abersychan ger Pontypwl.

Lansiodd yr heddlu ymgyrch yn y wasg a'r cyfryngau ac apelion nhw ati i ddychwelyd adref.

Derbyniodd ei theulu negeseuon tecst a galwadau ffôn oedd yn honni eu bod oddi wrth Jenna.

Ond sylweddolwyd yn ddiweddarach mai rhai ffug oedden nhw.

Cafodd llys-tad Jenna, Mike Baldwin, ei arestio chwe wythnos wedi iddi fynd ar goll.

Negeseuon ffug

Yn ddiweddarach, cafodd Mr Baldwin, 36, ei gyhuddo o'i llofruddio.

Fe ddaeth yr heddlu o hyd i gorff Jenna mewn bedd bas ger ffordd fynyddig rhwng Y Fenni a Blaenafon.

Cafwyd hyd i fodrwy oedd yn perthyn i Jenna.

Cadarnhaodd hyn amheuon yr heddlu mai gweddillion corff Jenna oedd y rhain.

Ond bu'n rhaid cynnal archwiliad post-mortem ac archwilio cofnodion deintyddol cyn y gallai'r heddlu gadarnhau hyn.