Cyngor o blaid canolfan ffilm

Mae Cyngor Rhondda Cynon Taf wedi cymeradwyo cynlluniau i adeiladu stiwdios ffilm newydd gwerth miliynau o bunnau yn y cymoedd.

Fe fydd y prosiect yn costio £300m ac yn cynnwys stiwdios teledu, ffilm, canolfan gyfryngau, academi sgrîn a pharc ffilm.

Daeth y cyngor i benderfyniad mewn cyfarfod brynhawn Iau rhoi caniatâd i gais cynllunio i'r safle yn Llanilid rhwng Caerdydd a Phen-y-bont ar Ogwr.

"Ein bwriad yw adeiladu'r stiwdios mwyaf modern, effeithiol o ran cost a mwyaf croesawgar yn y byd"

Yr Arglwydd Attenborough

Mae cwmni Dragon International Studios Limited, sydd yn cael ei gadeirio gan yr Arglwydd Richard Attenborough, eisoes wedi prynu 350 acer o'r safle a arferai fod yn bwll glo.

Cafodd y cynlluniau eu hatal am gyfnod wedi i Gynulliad Cenedlaethol Cymru orchymyn y cyngor i wrthod y cais cynllunio.

Roedd y Cynulliad yn gwrthwynebu'r cais am ffordd newydd a fyddai'n arwain o draffordd yr M4 tuag at y ganolfan.

Ond fe dynnodd swyddogion eu gwrthwynebiad yn ôl wedi i awdurdod lleol bwysleisio manteision economaidd y cynllun.

Mae'r datblygwyr wedi datgan y bydd hyd at 1,000 o weithwyr yn cael eu cyflogi yn ystod y cyfnod adeiladu ac y bydd 1,700 o swyddi yn cael eu creu pan fydd y ganolfan wedi agor.

Bydd y ganolfan, a godir ar 160 acer o dir, yn cynnwys gweithdai, stiwdio i recordio cerddoriaeth, adrannau creadigol, swyddfa a gwasanaethau.

Arglwydd Attenborough: Yn cefnogi'r cynlluniau

Mae cwmni Dragon Studios wedi addo y bydd gan y ganolfan ran bwysig mewn cyfathrebu digidol ar draws y byd.

Y nod yw cynnig lle i fusnesau o fewn y diwydiant Technoleg Gwybodaeth yng Nghymru.

Fe allai cam cynta'r cynllun fod ar agor erbyn diwedd 2004 gyda'r parc ffilm wedyn yn agor ym 2006.

Mae gan gwmni arall sef Partneriaeth Joseph Villard gynlluniau i ddatblygu tir gerllaw'r safle.

Maen nhw am adeiladu gwesty, canolfan gynadledda, spa ac ysbyty yn ogystal â nifer o barciau busnes.

6,000 o swyddi

Byddai hynny'n creu 6,000 o swyddi ychwanegol.

"Ein bwriad yw adeiladu'r stiwdios mwyaf modern, effeithiol o ran cost a mwyaf croesawgar yn y byd," meddai'r Arglwydd Attenborough.

"Yng Nghymru mae gennym ni'r lle, yr arian a'r dechnoleg - ond yn bwysicach na hynny yr ewyllys - i greu gwaith gwych ac amgylchedd hamdden i'r cenedlaethau i ddod."