Un o sioeau mwyaf Ewrop

Dyma'r lle gorau'n y byd i gweld defaid

Sioe Amaethyddol Cymru yw un o sioeau amaethyddol mwyaf Ewrop, ac yma y dangosir y nifer mwyaf o fridiau defaid yn y byd.

Cymdeithas Amaethyddol Frenhinol Cymru sy'n gyfrifol am y sioe a gynhelir bob blwyddyn tuag at ddiwedd Gorffennaf.

Sefydlwyd Cymdeithas Amaethyddol Cymru yn 1904

Cafodd y Gymdeithas ei ffurfio yn 1904 er mwyn hyrwyddo pob agwedd o amaethyddiaeth a chefn gwlad.

Ers ei sefydlu, tan ddechrau'r chwedegau, sioe deithiol oedd hon yn ymweld â gwahanol siroedd fel y câi wahoddiad ond yna penderfynodd y Gymdeithas gael maes parhaol yn Llanelwedd ger Llanfair ym Muallt.

Mae'r safle yma erbyn hyn yn cael ei defnyddio, nid yn unig ar gyfer y Sioe Aeaf ym mis Rhagfyr a Sioe'r Tyddynwyr ym mis Mai, ond hefyd nifer o sioeau gan gymdeithasau eraill yn amrywio o rai'n ymwneud â chefn gwlad i gymdeithasau beiciau modur.

Daw tua 250,000 i'r sioe bob blwyddyn

Er mai sioe amaethyddol yw hi, mae mwy iddi nag anifeiliaid a pheiriannau fferm. Ceir arddangosfeydd yn amrywio o waith coed i grefftau gwledig.

Yn y gorffennol, cafwyd arddangosfeydd gan griw o beiriannau JCBs, aelodau o'r Llynges a marchogion o Hwngari.

Yn fras mae'r maes yn cael ei rannu'n dair rhan; ger y brif fynedfa ceir y stondinau masnachol. Yn yr ail ran mae'r maes arddangos ac adeiladau'r anifeiliaid; ac yn y drydedd, o gwmpas llyn bychan, mae llecyn ar gyfer crefftau gwledig a lle gellir gwrando ar gerddoriaeth gan fandiau jazz a milwrol.