Môn: Awyren yn cwympo i'r ddaear

Mae awyren Hawk o Ganolfan Awyrlu Y Fali wedi disgyn i'r ddaear ger pentre Caergeiliog ar Ynys Môn.

Digwyddodd tua 0730 GMT fore Gwener.

Fe lwyddodd y peilot i ddianc o'r awyren cyn iddi ddisgyn, ac fe aed ag ef i ysbyty Gwynedd ym Mangor yn diodde o anafiadau i'w gefn.

Dywedodd yr awyrlu eu bod nhw'n meddwl mai aderyn yn hedfan i injan berodd y ddamwain.

Maen nhw'n dweud fod y peilot wedi trio glanio, ond fe ddaeth hi'n fwyfwy amlwg iddo fod yr Hawk yn colli pwer felly fe benderfynodd ymdaflu ei hyn o'r awyren.

Cadarnhaodd Gwasanaeth Tân y Gogledd fod dau o'u cerbydau wedi eu hanfon i'r safle.

Glaniodd yr awyren mewn cae 50 llath o ffordd annosbarthedig yng Nghaergeiliog.

Yn ôl llygad-dystion fe allai'r awyren yn hawdd fod wedi taro adeiladau.

Fflamau a mwg

Roedd Frank Roberts rhyw filltir o safle'r ddamwain:

"Roeddwn i wrthi'n wyno - mewn efo'r defaid, ac mi glywson ni goblyn o fang enfawr a wedyn bang llai arall ar ei ôl.

"Es i draw at fy ffrind a dweud wrtho bod rhywbeth wedi digwydd ac fe ethon ni allan i gael gweld ac fe welon ni fod na fflamau a mwg mawr - ac mi roedd hyn tua milltir - milltir a hanner oddi wrthon ni.

"Welson ni ddim son o'r peilot er inni fynd allan yn reit sydyn wedi'r digwyddiad.

"Mi gyrhaeddodd y gwasanaethau brys o fewn munudau i'r digwyddiad.

"Roedd yna lawer o fflamau a mwg mawr ond fe lwyddodd y gwasanaethau brys ddiffodd y tân o fewn rhyw 5 munud - ac erbyn hyn, mwg gwyn sydd i'w weld yn unig."